Buxoro viloyati hokimligi

Qorakoʻl tumani miqyosida olsak, irrigatsiya va melioratsiya tarmoqlarida shu kunga qadar hududda umumiy uzunligi 170 kilometrga teng ichki tarmoq ariqlarini betonlashtirish chora-tadbiri koʻrilgan. Bugunga kelib tumanda ichki suv tarmoqlari umumiy uzunligi 1850 kilometrni tashkil etib, shundan joriy qishki mavsumda va erta bahorda hududda faoliyat yuritayotgan jami 245 ta fermer xoʻjaligining ichki sugʻorish ariqlarini betonlashtirish ishlari soʻnggi bosqichda davom ettirilmoqda. Jarayonda har bir fermer xoʻjaligi zimmasiga oʻz tasarrufidagi ichki sugʻorish tarmogʻining kamida 1 ming metr qismini betonlashtirish vazifasi yuklangan.  

Albatta, ekin yerlariga boradigan suv yoʻllari, ariq va kanallarni tozalash, oʻzanini betonlashtirish kabi yumushlar ham konturlar meliorativ holatini yaxshilashi barobarida yerdan moʻl hosil olish garovidir. Jumladan, tumandagi Bandboshi, Xoʻjakon, Mallaishayx va Ziyorat mahallalarida joylashgan aholi tomorqalari hamda hududdagi fermer xoʻjaligi dala maydonlarini “obi hayot” bilan taʼminlashga xizmat qiladigan suv sigʻimi 1,5 kub metrga teng suv oʻtkazish quvvatiga ega "Ziyorat" kanalining 9 ming metr oʻzanini betonlashtirish ishlari  bormoqda.  

— Suv taqchilligi yil sayin kuchayayotgan hozirgi paytda ekin yerlarini sugʻorishda katta ahamiyatga ega xoʻjaliklararo ariqlarni betonlashtirish ishlarini qizgʻin davom ettirmoqdamiz, — deydi tuman suv yetkazib berish xizmati davlat muassasasi direktori  Azamat Otaqulov. — Zero, bu bilan kanal va ariqlarda suv ravon oqadi va asosiysi, bebaho tabiat neʼmati koʻp miqdorda isrof boʻlishining oldi olinadi. Ayni kunda hududda 154 ming metr  xoʻjaliklararo hamda 1850 kilometr uzunlikdagi ichki sugʻorish tarmogʻi  mavjud boʻlib, hozirda bu gidroinshootlarning aksariyatida beton yotqizish, tozalash  ishlari amalga oshirilmoqda. 

Darhaqiqat, xalqimizda “Otang mirob boʻlsa ham, bir tomchi suvni isrof qilma” degan purmaʼno gap bejiz aytilmagan.

Betonlashtirish  ishlarini tez va soz yakunlash maqsadida qurilish maydoniga yetarli texnika va ishchi kuchi jalb qilingan. Tabiiyki, ariq oʻzanini betonlashtirish ishlari nihoyasiga yetgach, unda suv oʻtkazish quvvati yaxshilanadi, isteʼmolchi xoʻjaliklar “obi hayot” bilan barqaror taʼminlanadi. 

Viloyat hokimligi matbuot xizmati