Peshku: “Ibn Sino”da Toshovlar dehqon xoʻjaligi issiqxonadan moʻl hosil olmoqda
2025-12-01 20:25:00 / Yangiliklar
Mazkur qarorlar tufayli chekka tumanda maydoni 1811 gektar ekin yeri auksion savdolariga chiqarilib, dehqonchilik qilish istagida boʻlgan 11 ming 50 nafar talabgor fuqaroga oʻrtacha 10 sotixdan ajratib berilgan. Bunda “Bir kontur – bir mahsulot” tamoyili asosida sabzavot, asosan, pomidor, bodring yetishtirish maqsad qilingan.
Mazkur saʼy-harakat tufayli xususan, "Ibn Sino" mahalla fuqarolar yigʻinida 56,1 gektar yer maydoni 469 nafar aholi vakiliga ajratib berilib, dehqon xoʻjaligi tashkil etilgan. Bugunga kelib shu yer maydonining 39 gektar qismida issiqxona xoʻjaligi tashkil etilgan boʻlib, almashlab ekish tamoyili asosida pomidor, kartoshka, bodring va turli rezavor koʻkatlar ekib yetishtirilmoqda.
Ayni kunda Ibn Sino mahalla fuqarolar yigʻinida 1040 ta xonadon va 1361 ta oila mavjud boʻlib, ularda jami 4 ming 829 nafar aholi istiqmat qilmoqda. Yuqorida taʼkidlanganidek, mahallaning ixtisoslashuvi asosan, dala-dehqonchilik, tomorqa va issiqxona xoʻjaligi.
Ayni kunda hududda mahallaning 1 ming 300 nafarga yaqin aholisi issiqxona xoʻjaliklarida band. Mahalladagi issiqxona xoʻjaligi tashkil etilgan maydon jami 50,6 gektar shundan, 15,8 gektar aholi xonadoni va 34,8 gektar aholi dala tomorqasiga toʻgʻri keladi.
Dala issiqxonalarida mahsulot yetishtirish tahlil qilinganda, 1 sotix ekin maydonida pomidor yetishtirilganda, yiliga oʻrtacha 7 tonna mahsulot olish tajribasi shakllangan. Bundan erishilayotgan sof foyda salmogʻi shu yili 30 million soʻmni tashkil etmoqda.
Jumladan, Shahriyor Toshov oilasi aʼzolari ham tasarrufidagi 10 sotixli issiqxona mehnatidan qoʻlga kiritayotgan daromadi 95 million soʻmdan kam emas. Halol peshona teri evaziga dehqon xoʻjaligi mehnatkashlari nafaqat roʻzgʻori badastirligini qoplamoqda, balki, mahalladoshlari dasturxoni toʻkinligiga ham baholiqudrat hissa qoʻshmoqdalar.
Viloyat hokimligi matbuot xizmati