Buxoro viloyati hokimligi

“Obod mahalla” dasturi asosida qahramonliklar uchun ham infratuzilma yaxshilangan. Xususan, ichki yo‘llar asfaltlanib, pidyodalar yo‘laklari qurilgan. Transformator o‘rnatilib, elektr tarmoqlari yangilangan. Jumladan, bunda qaysi kasb-korda mehnat qilmasin, albatta, hovlisidagi tomorqa yerida ishlab, mashaqqat bilan hosil yetishtirib, daromad topayotgan xo‘jaliklar yetarlicha.  

Viloyat hokimining birinchi o‘rinbosari Botir Ahmedov boshchiligida kuni kecha Qahramon mahallasida bo‘lib o‘tgan ko‘rgazmali o‘quv-amaliy seminari ham xonadonlarda mavjud ekin yeridan samarali foydalanish, ehtiyojmand oilalarga daromad manbaini yaratish, ishsiz va kambag‘al oilalar daromadini oshirishdek dolzarb masalaga bag‘ishlandi.  

Ta’kidlanganidek, hududda tomorqa madaniyatini shakllantirayotgan mirishkorlar bilan birga ehtiyojmand oilalar mehnatga layoqatli a’zolariga ekin yeri berish, bu yerda ro‘zg‘or ehtiyojiga yarasha peshona terini to‘kib, sabzavot-poliz mahsulotlari ekib yetishtirishi uchun imkoniyat yaratishga alohida e’tibor qaratilmoqda. 

Ma’lumotlarga nazar solsak, Qahramon mahallasida issiqxona yo‘nalishida  band xonadon soni 608 tani, ya’ni 83 foizni tashkil etib, shundan 152 gektar issiqxona yerida dehqonchilik qilinmoqda. Shundan hududda aholi xonadonlarida 77 gektarda, daladagi 75 gektar yerda tashkil qilingan dehqon xo‘jaliklarida peshma-pesh hosil yetishtirish tajribasi shakllangan. 

“Bir mahalla—bir mahsulot” tamoyili asosida tumandagi mahallalarni shakllangan tajriba asosida aniq bir ekin turiga ixtisoslashtirish, bunda tajribali fermer, dehqon va tadbirkor ayollar ish uslubini ommalashtirish muhim ahamiyat kasb etmoqda. Viloyat va tuman mutasaddilari, mahalla faollari, dehqon va tomorqachilar hozir bo‘lgan tadbirda hududda ehtiyojmand oilalar a’zolariga tomorqa sifatida ajratib berilgan 10 gektarli ekin yerida issiqxona barpo etish ishlariga kirishilgani alohida qayd qilindi. 

Namuna o‘rnida, deylik 10 sotixdan iborat issiqxonada mahsulot yetishtirish hajmlari o‘rganildi. Mutaxassis agronomlar xulosasiga binoan bu yerda dastlabki hosilda 2500 tup pomidor ko‘chati o‘tqazib, parvarishni yaxshi olib borsa, 10 tonnagacha sara hosil olish mumkin. Ikkinchi hosilda esa bulg‘or qalampiridan  4 000 ta ko‘chat o‘tqazib, 4,5 tonna atrofida hosil yetishtirish tajribasi bor. Shu bilan xonadon yoki dehqon xo‘jalikda qo‘lga kiritiladigan daromad salmog‘i 90 – 100 million so‘m atrofida bo‘ladi. 

Ko‘rgazmali o‘quv seminarida viloyat hokimining birinchi o‘rinbosari Botir Ahmedov, Romitan tumani hokimi Umid Barnoyev, respublika Markaziy banki viloyat boshqarmasi boshlig‘i Erkin Mansurov va boshqalar tomonidan yig‘ilganlar, tomorqa yer egalariga zarur tavsiyalar berildi.  

Tomorqalar nafaqat oila ehtiyojini ta’minlash, balki hosilni bozorga chiqarish orqali qo‘shimcha daromad manbaiga ham aylanishi lozim. Shu ma’noda, viloyat hokimining birinchi o‘rinbosari Botir Ahmedov qahramonlik mirishkor tomorqachilardan, ayni kunda 20 sotixdan iborat issiqxonasini yashnatib, daromad manbaiga aylantirgan Hoji Baqoyev hamda tomorqasining 6 sotix yerida issiqxona qurib, yilida 3 marta hosil yetishtirayotgan Najmiddin Jumayevlar xonadonlarida bo‘ldi. 

Bu issiqxonalarda bugun bulg‘or qalampiri ekib yetishtirilmoqda. Hududda shunday mehnatda band bo‘lgan Gulbodom Karimova, Xalil Qobilov, Gulbahor To‘xtayeva, Charos Fatullayeva singari mirishkorlar tajribasi boshqalarga ibrat, o‘rganishga arzirli ishdir. Muhimi, chekka mahallada bugun issiqxona xo‘jaligi bilan shug‘ullanuvchi aholi xonadonlari safi kengaymoqda. 

Viloyat hokimligi matbuot xizmati