Buxoro viloyati hokimligi

Ekin yerida har yili sabzavot-poliz mahsulotlarini yetishtirib kelayotgan xonadon bekasi oila aʼzolari koʻmagida issiqxona barpo etib, dehqonchilikni  yanada rivojlantirib, yilida ikki-uch marta hosil yetishtirib, samaradorlikka ham erishmoqda. Mahalla maʼmuriyati koʻmagida Bozorovlar oilasiga tijorat bankidan ajratilgan imtiyozli kredit mablagʻi—33 million soʻm sarmoya issiqxona qurish tashabbusini roʻyobga chiqarish va hosil yetishtirishda juda qoʻl keldi.     

Shuningdek, xonadon bekasining qizi Nilufar Muhitdinova kambagʻallik reestriga kiritilib, oilaga 30 sotix yer maydoni ajratilgani, bu yerda dehqon xoʻjaligi tashkil qilingani yana qoʻshimcha imkoniyatdir. Oilaga ixcham issiqxona qurib berilgani bunda yashovchilar bandligi va dasturxoni toʻkinligini  taʼminlash barobarida, ularni muntazam daromadga ega boʻlgan tadbirkor oilaga aylantirdi.

—Issiqxonamizda dastlab pomidor yetishtirdik va juda yaxshi daromad oldik. Hosilni yigʻib olganimizdan soʻng bodring parvarishiga kirishdik. Mehnat qilganning mehnati zoye ketmas ekan, astoydil mehnat ortidan baraka topayapmiz,— deydi mehnatkash ayol Sabohat Bozorova.—Hozirda issiqxonada bodring yetishtiryapmiz. Hosil choʻgʻi koʻzlaganimizdek. Buning natijasida har oyda 4 million soʻmdan ortiq sof foyda olishga ham erishmoqdamiz. Asosiysi, mahsulotimizning bozori chaqqon, ochigʻi, mahalladan ortmayapti.

Aynan shu oila va Sabohat Bozorova faoliyatidan koʻrish mumkinki,  yaratilayotgan imkoniyat va qulayliklar aholi bandligini taʼminlash, oilalarning barqaror daromad manbaiga ega boʻlishi va turmush sifatini yaxshilashga xizmat qiladi.

Viloyat hokimligi matbuot xizmati