Buxoro viloyati hokimligi

Navroʻzliklar jajji farzandlari uchun bolalar bogʻchasiga boʻlgan ehtiyoj bartaraf qilinib, hududda 90 oʻringa moʻljallangan zamonaviy maktabgacha taʼlim muassasasi qurib bitkazildi. Ikki qavatli, shinam inshoot qurilishi pudratchi "Gʻijduvon Gʻovshun maxsus qurilish-montaj" MCHJ mohir binokorlari tomonidan amalga oshirildi. 

Mazkur loyihaga umumiy qiymati 4 milliard soʻmga yaqin mablagʻ sarflanib, bunda jajji oʻgʻil-qizlar uchun zarur shart-sharoit, kerakli inventarlar, adabiyot va oʻquv qurollari bilan jihozlangan dars, mashgʻulot xonalalari, oʻyin maydonchalari, shinam yotoqxona, oshxona, sanitariya va isitish tarmogʻi shay qilingan. Endilikda oʻndan ortiq tarbiyachi-xodim bogʻchaga qatnaydigan bolajonlar taʼlim-tarbiyasiga masʼul sifatida biriktirilgan.        

Kuni kecha ushbu 18-sonli davlat maktabgacha taʼlim tashkilotining tantanali ochilish marosimi boʻlib oʻtdi. Unda tuman hokimligi, jamoatchilik vakillari, mahalla faollari, ota-onalar ishtirok etdilar. 

Tadbirda soʻz olganlar obod qishloqlarimiz, yangilanayotgan taʼlim muassasalari va bunyodkorlik ishlari orqali yurtimiz bolajonlari farovon hayot va munosib taʼlim olish imkoniyatiga ega boʻlayotganlarini alohida taʼkidladilar.

Shundan soʻng muassasa ramziy qizil lentasi qirqilib, yigʻilganlar  taʼlim tashkilotida bolajonlar uchun yaratilgan shart-sharoit bilan yaqindan tanishdilar. Yakunda tuman hokimi boshchiligidagi mutasaddilar mahalla ahli bilan birgalikda bolalar bogʻchasi hududiga yaxshi niyatlar bilan manzarali koʻchatlar oʻtqazdilar.

Viloyat hokimligi matbuot xizmati