Kogon: chambaronlik Saidovlar xonadoni ham issiqxona va chorva mollari boqishdan baraka topmoqda
2025-11-19 10:05:00 / Yangiliklar
Mahalla maʼmuriyati, bevosita masʼul “yettilik” saʼy-harakati bilan joriy yilda niyozhojiliklarning 320 nafari doimiy ish bilan taʼminlangan. Eʼtiborlisi, ularning aksariyati kam taʼminlangan, madadga muhtoj oilalar vakillari. Birgina “Har bir oila—tadbirkor” davlat dasturi doirasida joriy yil boshidan mahalla ahli uchun 1 milliard 200 million soʻm atrofida mablagʻ moliyalashtirilgan. Bu mablagʻ oltmishga yaqin tashabbuskorga rasmiylashtirib berilgani natijasida turli jabhada kichik sex koʻrinishida loyihalar ishga tushirilgan.
Niyozhojida yashovchi aholi asosan dehqonchilik va tadbirkorlik bilan shugʻullanadi. Tomorqa mehnati bilan birga savdo va tijorat ishi, aholiga maishiy xizmat koʻrsatish tarmogʻi rivojlanmoqda. Ayniqsa, tomorqasidan unumli hosil olib, oilalariga moʻmay daromad keltirayotgan yoki chorva mollarini koʻpaytirib, moddiy manfaat topayotgan mehnatkashlar safi kengaymoqda.
Aynan Niyozhoji mahallasi, Chambaron qishlogʻida istiqomat qiluvchi Bahodir Saidov ham daromad manbaini koʻpaytirish va bandlikni taʼminlashga qaratilgan imtiyozlardan oqilona foydalanayotganlardan biri.
Dastlab, joriy yil boshida mahalladagi hokim yordamchisi koʻmagida 66 million soʻm miqdoridagi imtiyozli kredit mablagʻini rasmiylashtirib olgan xonadon sohiblari bu sarmoyadan samarali foydalanib, “smental” va “angust” zotiga mansub qoramollardan 4 boshini xarid qilib, bor kuch va imkoniyatini chorvachilikka qaratdilar. Ayni kunda mazkur qoramollar parvarishda, tomorqada esa roʻzgʻor ehtiyoji uchun sabzavot mahsulotlari yetishtirish barobarida chorva mollari uchun ozuqabop ekinlar yetishtirilib, qishga zarur yem-xashak zahirasi tayyorlangan. Nasldor qoramollardan boʻrdoqiga boqilgani hademay 300 kilogramdan goʻsht berishi ularga qilingan sarf-xarajatni qoplaydi.
Shuningdek, Saidovlar xonadoni aʼzolari hovli etagidagi ekin yerining 2 sotixli qismida issiqxona ham qurib, unda peshma-pesh kartoshka, pomidor, bodring va kech kuzdan boshlab turli koʻkatlar ekib yetishtirib kelishadi. Dehqonchilikni yil boʻyi olib borishga urinayotgan mirishkorlar yarim tonnadan ziyod kartoshka, shuncha atrofida pomidor yoki piyoz jamgʻarib roʻzgʻor ehtiyojidan ortganini qoʻni-qoʻshni, mahalladoshlar dasturxoniga tortiq qilib, yaxshigina daromadga ham ega boʻlishmoqda.
Aytish joizki, Kogon tumanida tadbirkorlikni qoʻllab-quvvatlash, ayniqsa, ijtimoiy muhofazaga olingan har bir xonadonda barqaror daromad manbaini yaratishga doir amaliy harakat davom ettirilmoqda.
Viloyat hokimligi matbuot xizmati