Халқаро миграция форуми: хавфсиз, тартибли ва қонуний меҳнат миграциясини ривожлантиришда янги босқич
2026-05-20 11:50:00 / ОАВ биз ҳақимизда
Халқаро форумда миграциянинг барқарор ривожланиш ва иқтисодий ўсишдаги роли, меҳнат бозорининг глобаллашуви ҳамда мигрантлар ҳуқуқларини ҳимоя қилиш масалалари кенг муҳокама қилинди.
Мазкур нуфузли форум хавфсиз, тартибли ва қонуний миграция тизимини ривожлантириш мақсадида Марказий Осиё, Осиё, Европа, АҚШ ҳамда бошқа минтақалардан 40 дан ортиқ давлат вакилларини бир майдонга жамлади. Унда 600 дан ортиқ иштирокчи, жумладан вазирлар, вазир ўринбосарлари, халқаро ташкилотлар ва хусусий сектор вакиллари иштирок этди.
Халқаро форумда миграциянинг барқарор ривожланиш ва иқтисодий ўсишдаги роли, меҳнат бозорининг глобаллашуви ҳамда мигрантлар ҳуқуқларини ҳимоя қилиш масалалари кенг муҳокама қилинди.
Халқаро миграция ташкилотининг 2026 йилги ҳисоботига кўра, бугун дунё бўйлаб 304 миллионга яқин халқаро мигрант мавжуд бўлиб, уларнинг 168 миллиони меҳнат мигрантларидир. Улар жаҳон иқтисодиётига сезиларли ҳисса қўшиб, қарийб 905 миллиард АҚШ доллари миқдорида пул ўтказмаларини амалга оширмоқда.
Форум доирасида бир қатор халқаро келишувлар ва учрашувлар амалга оширилди. Жумладан, халқаро иш берувчилар билан 20 дан ортиқ ҳамкорлик шартномаларини имзолашга келишилди.
Шунингдек, Тошкент шаҳрида хорижда ишлаш ниятида бўлган фуқароларни замонавий касблар ва тилларга ўқитишга ихтисослашган “ИНТИЛ” халқаро тил ва касб маркази очилди.
Марказ инфратузилмаси 600 ўринли ўқув хоналари, 180 ўринли амалий машғулот хоналари, 120 ўринли имтиҳон маркази ҳамда 400 ўринли ётоқхонадан иборат. Бу ерда ҳамширалик, пайвандчилик, сантехника, электротехника, мехатроника, юк машинаси ҳайдовчилиги, HoReCa соҳаси ва бошқа йўналишларда амалий таълим йўлга қўйилган.
Марказда немис, япон, корейс, рус, инглиз, итальян ва француз тиллари ўқитилади ҳамда халқаро сертификатларга тайёргарлик жараёнлари амалга оширилади.
Форум доирасида Ўзбекистон ва Япония ўртасида меҳнат миграцияси соҳасида ҳам муҳим келишувлар имзоланди. Ўзбекистон Республикаси Вазирлар Маҳкамаси ҳузуридаги Миграция агентлиги директор ўринбосари Элёр Тоштемиров Япония делегацияси вакиллари билан учрашув ўтказди.
Учрашувда Япониянинг FESCA ташкилоти директори Кадзутакa Накао иштирок этди.
Томонлар ўзаро ҳамкорликни кенгайтириш, малакали кадрлар тайёрлаш ва Япония меҳнат бозорига Ўзбекистон фуқароларини хавфсиз, тартибли ва қонуний тарзда йўналтириш масалаларини муҳокама қилди.
Кадзутакa Накао Ўзбекистондаги ислоҳотлар, инфратузилма ва меҳнат миграцияси соҳасидаги янгиланишларга юқори баҳо берди ҳамда ҳамкорликни кенгайтиришга тайёр эканини билдирди.
Миграция агентлиги Қашқадарё ҳудудий филиали раҳбари Жавоҳир Турсунов форум доирасида амалга оширилаётган халқаро келишувлар ҳақида маълумот берди.
— Форум доирасида кўплаб учрашувлар ўтказилди. Жумладан, Миграция агентлиги Қашқадарё ҳудудий филиали ва Исроил давлати элчихонаси ҳамда Исроил Ташқи ишлар вазирлиги раҳбарияти билан учрашув ўтказиб, келишувга эришилди. Бунда фуқароларимизни қурилиш соҳаси, хизмат кўрсатиш соҳаларига тартибли ишга юбориш, шунингдек Япония, Жанубий Корея, Сербия давлатлари билан Ўзбекистон фуқароларини тартибли, хавфсиз ва қонуний миграцияга юбориш бўйича келишувларга эришилди, — деди Жавоҳир Турсунов.
Унинг таъкидлашича, хорижий иш берувчилар билан тўғридан-тўғри ҳамкорлик қилиш орқали Ўзбекистон фуқаролари учун юқори даромадли иш ўринлари яратишга эътибор қаратилмоқда.
Форумда сўзга чиққан Миграция агентлиги директор ўринбосари Элёр Тоштемиров миграция сиёсатида инсон қадрига алоҳида эътибор қаратилаётганини таъкидлади.
— Фуқаролар хорижга чиқишдан олдин махсус тайёргарлик курсларидан ўтказилади. Бу курслар Халқаро миграция ташкилоти (IOM), ICMPD ва GIZ каби халқаро ҳамкорлар билан биргаликда ташкил этилган деди, — Элёр Тоштемиров.
Фуқаролар борилаётган давлат қонунчилиги, маданияти ва меҳнат тартиблари бўйича тўлиқ тайёргарликдан ўтади деди, у.
Шунингдек, хорижда қийин вазиятга тушиб қолган фуқароларга бепул ҳуқуқий ва моддий ёрдам кўрсатиш тизими йўлга қўйилган алоҳида таъкидлади.
Тошкентда бўлиб ўтган биринчи халқаро миграция форуми Ўзбекистоннинг глобал миграция сиёсатида фаол иштирок этаётганини яна бир бор намоён этди.
Форум натижаларига кўра, мамлакат халқаро ҳамкорликни кенгайтириш, малакали кадрлар тайёрлаш ва фуқаролар ҳуқуқларини ҳимоя қилиш борасида янги босқичга чиқмоқда.
Экспертлар фикрича, мазкур форум нафақат Ўзбекистон, балки бутун минтақа учун миграция соҳасида янги имкониятлар эшигини очиб берди.
Манба: yuz.uz