Yuridik shaxslar qayta ro‘yxatdan o‘tishda nimalarga e’tibor berishi kerak?
2025-07-04 11:15:00 / Qo'mita yangiliklari
Yuridik shaxslar yuridik manzilini o‘zgartirganda yoki qayta tashkil etilganda (qo‘shib yuborish, qo‘shib olish, qayta tuzish, bo‘lish yoki ajratib chiqarish) Davlat xizmatlari markazlari tomonidan qayta ro‘yxatdan o‘tishlari lozim.
❗️Ro‘yxatdan o‘tish ma’lumotlari o‘zgartirilganda soliq majburiyatlarining bajarilishi tekshiriladi va quyidagi asoslarga ko‘ra rad etilishi mumkin:
- yuridik shaxsning BHMning 50 barobaridan ortiq soliq qarzi mavjudligi;
- amalga oshirilgan tovar aylanma yoxud tovarlar importi bo‘yicha realizatsiya hajmining soliq hisobotlarida to‘liq aks ettirilmaganligi;
- soliq hisobotlari belgilangan muddatlarda taqdim etilmaganligi.
Agar belgilangan mezonlarga mos kelmaganligi sababli qayta ro‘yxatdan o‘tish rad etilgan bo‘lsa, kamchiliklar bartaraf etilgach, Davlat xizmatlari markazlariga qayta murojaat qilish mumkin.
Biroq ba’zi tadbirkorlik sub’yektlari tomonidan soliq nazoratidan qochish, shubhali tovar aylanmalarini amalga oshirish maqsadida bir hududdan boshqa hududga ko‘chish yoki boshqa tadbirkorlik subyekti tarkibiga qo‘shib yuborishga urinish holatlari ko‘paymoqda.
Soliq organlari tomonidan o‘tkazilgan tahlillar natijalariga ko‘ra bunday noqonuniy xatti-harakatlar tezda aniqlanib, qonunchilik talablari asosida tegishli choralar ko‘rilmoqda.
Ma’lumot uchun:
2025 yil yanvar-iyun oylarida jami 9 413 ta tadbirkorlik sub’yekti ko‘chish va qo‘shilish bo‘yicha qayta ro‘yxatdan o‘tgan.
Shundan:
- 7 045 tasi yuridik manzilini o‘zgartirgan;
- 2 368 tasi boshqa korxona tarkibiga qo‘shilgan.
2025-yil iyun oyining o‘zida yuridik shaxslarning 699 tasi yuridik manzilini o‘zgartirgan va 130 tasi boshqa korxona tarkibiga qo‘shilgan, biroq, 1 436 ta holatda korxonalar yuqoridagi mezonlarga to‘g‘ri kelganligi sababli rad javobi berilgan.
Soliq to‘lovchilarni hisobga olish va hisobini yuritish bo‘limi
