“O‘zbekiston Respublikasining Soliq kodeksiga qo‘shimcha va o‘zgartishlar kiritish to‘g‘risida” O‘zbekiston Respublikasining Qonuni qabul qilindi.

2024-yil 15-noyabrdagi O‘RQ-1000 

Mazkur Qonun bilan Soliq kodeksiga quyidagi qo‘shimcha va o‘zgartirishlar kiritiladi:

1) 60-moddada tadbirkorlik subyektlarining barqarorlik reytingi tushunchasi kiritilgan;

2) 104-modda tadbirkorlik subʼyektlarining Barqarorlik reytingi yuqori boʻlgan tadbirkorlik subʼyektlariga (davlat korxonalari va ustav fondida(ustav kapitalida) davlat ulushi 50 foiz yoki undan yuqori bo‘lgan yuridik shaxslar bundan mustasno):

- ortiqcha to‘langan soliqni qaytarish soliq organiga bunday ariza kelib tushgan kundan boshlab uch kun ichida (qo‘shilgan qiymat solig‘idan tashqari) amalga oshiriladi;

Ma’lumot uchun: boshqa soliq to‘lovchilar uchun ortiqcha to‘langan soliq summasini qaytarish o‘n besh kun ichida amalga oshiriladi.

- ortiqcha to‘langan soliq summasini qaytarish to‘g‘risidagi qaror soliq organi tomonidan soliq to‘lovchining tegishli ariza olingan kundan boshlab yoki agar birgalikda o‘zaro solishtirish o‘tkazilgan bo‘lsa, soliq organi soliq to‘lovchi bilan u to‘lagan soliqlarning birgalikdagi o‘zaro solishtirish dalolatnomasini imzolagan kundan e’tiboran ikki kun ichida qabul qilinadi.

Ma’lumot uchun: boshqa soliq to‘lovchilar uchun pulni qaytarish to‘g‘risidagi qaror soliq organi tomonidan o‘n kun ichida qabul qilinadi.

3) 105-modda tadbirkorlik sub’ektlarining Barqarorlik reytingi yuqori bo‘lgan xo‘jalik yurituvchi subyektlarga ortiqcha undirilgan soliq summasini soliq organiga bunday soliqni olgan kundan e’tiboran uch kun ichida unga hisoblangan foizlar bilan (qo‘shilgan qiymat solig‘idan tashqari) qaytarib beriladi.

Ma’lumot uchun: boshqa soliq to‘lovchilar uchun ortiqcha undirilgan soliq summasini qaytarish o‘n besh kun ichida amalga oshiriladi.

4) 137-moddasi quyidagilar bilan to‘ldirildi, unga muvofiq “AAA” toifasidagi tadbirkorlik subyektlari (bundan davlat korxonalari va ustav fondi (ustav kapitali)da davlat ulushi 50 foiz va undan ortiq bo‘lgan yuridik shaxslar mustasno)da soliq tekshiruvlari o‘tkazilmaydi (jinoyat ishlari bo’yicha o‘tkazilgan tekshirishlar bundan mustasno).

5) tadbirkorlik subyektlarining barqarorlik reytingi yuqori bo‘lgan “AAA” toifasidagi tadbirkorlik sub’yektlariga nisbatan qo‘shilgan qiymat solig‘ining ortiqcha to‘lovlarini qaytarish bir kun ichida amalga oshiriladi, ushbu holatda qaytarish uchun ko‘rsatilgan QQS summasining haqiqiyligini aniqlash uchun kameral soliq tekshiruvi o‘tkazilmaydi.

Soliq solish metodologiyasi boshqarmasi