Oʻzbekiston Respublikasi Soliq qoʻmitasi

Soliq qo‘mitasi Inson resurslarini rivojlantirish va boshqarish departamenti tomonidan o‘tkazilgan ichki so‘rovnomada qariyb 9 ming nafar soliq organlari xodimi ishtirok etdi.

So‘rovnomaning asosiy maqsadi – xodimlarning fikr va takliflarini o‘rganish, mehnat sharoitlarini xolis baholash, mavjud muammolarni aniqlash hamda tizimni yanada takomillashtirishning ustuvor yo‘nalishlarini belgilashdan iborat bo‘ldi.

So‘rovnoma nimani ko‘rsatdi?

Tahlillar soliq tizimida sog‘lom korporativ muhit shakllanganini yana bir bor tasdiqladi. Ishtirokchilarning aksariyati jamoadagi ahillik, rahbariyat bilan samarali muloqot va o‘zaro ishonch muhitini yuqori baholadi. Shuningdek, ko‘pchilik o‘zining mehnat faoliyatini uzoq muddat davomida aynan soliq organlarida davom ettirish niyatida ekanini bildirdi.

Bu natijalar xodimlarning tizimga bo‘lgan ishonchi, sohaga sadoqati va o‘z kasbiga mas’uliyat bilan yondashayotganini yaqqol namoyon etdi.

Shu bilan birga, so‘rovnoma mehnat sharoitlarini yanada yaxshilash, ayrim ish jarayonlarini soddalashtirish, xodimlarning malakasini oshirish va kasbiy rivojlanish imkoniyatlarini kengaytirish, rag‘batlantirish tizimini takomillashtirish hamda ichki boshqaruv jarayonlari samaradorligini oshirish zarur bo‘lgan yo‘nalishlarni ham belgilab berdi.

Tahlildan — amaliy choralarga

So‘rovnoma davomida bildirilgan barcha taklif va mulohazalar atroflicha tahlil qilindi. Aniqlangan har bir yo‘nalish bo‘yicha manzilli chora-tadbirlar rejasi — «yo‘l xaritalari» ishlab chiqildi va ularni amalga oshirish ishlari boshlandi.
Jumladan, quyidagi ustuvor vazifalar belgilangan:

🔘 mehnat sharoitlarini yanada yaxshilash;
🔘 inson resurslarini boshqarishning zamonaviy mexanizmlarini joriy etish;
🔘 malaka oshirish va kasbiy rivojlanish dasturlarini kengaytirish;
🔘 xodimlarning xizmat pog‘onalari bo‘ylab o‘sishi uchun qo‘shimcha imkoniyatlar yaratish;
🔘 ichki ish jarayonlari va boshqaruv samaradorligini yanada oshirish.

Soliq qo‘mitasi uchun xodimlarning fikri va tashabbuslari tizimni rivojlantirishning muhim omili hisoblanadi. Shu bois, har bir taklif va mulohaza asosida zamonaviy, samarali va xodimlar uchun yanada qulay mehnat muhitini yaratishga qaratilgan islohotlar izchil davom ettirilmoqda.