Keshbek tizimida soxta cheklar orqali budjet mablagʻlarini talon-toroj qilishga urinishlar oldi olinmoqda
2026-07-09 20:10:00 / Qo'mita yangiliklari
Avval xabar berganimizdek, soxta realizatsiya fiskal cheklari orqali keshbek summalarini asossiz ravishda qaytarib olish holatlari aniqlanmoqda.
Jumladan, 2026-yil 13-may kuni (bir kunning oʻzida) ZBS (nomi o‘zgartirgan) MChJdan FEO MChJ (nomi o‘zgartirgan) 505,2 mlrd soʻmlik saryogʻ, 81,8 mlrd soʻmlik 1-navli un hamda 455,9 mlrd soʻmlik boshqa oziq-ovqat mahsulotlariga realizatsiyasiga elektron hisobvaraq-fakturalarni rasmiylashtirib kirim qilingan.
Biroq ushbu jamiyatlarda oʻtkazilgan sayyor soliq tekshiruvi davomida hisobda realizatsiya qilinmagan deb koʻrsatilgan 1 trln 42 mlrd 900 mln soʻmlik tovarlar omborlarda yoki realizatsiya joylarida mavjud emasligi (kamomad) aniqlandi.
Natijada ushbu jamiyatlar orqali soxta keshbek olishga qaratilgan sxema bartaraf etildi. Toʻplangan tekshiruv materiallari huquqni muhofaza qiluvchi organlarga yuboriladi.
Shuningdek, 2026-yil 8-iyul kuni ZBS MChJda Surxondaryo viloyati soliq boshqarmasi tomonidan oʻtkazilgan sayyor soliq tekshiruvida 4 trln 562 mlrd 813 mln soʻmlik tovarlar ombor yoki realizatsiya joylarida mavjud emasligi (kamomad), shuningdek, 1 trln 606 mlrd 174 mln soʻmlik kirim qilinmagan tovarlar realizatsiya qilingani aniqlandi.
Mazkur holatlar yuzasidan rasmiylashtirilgan tekshiruv hujjatlari huquqni muhofaza qiluvchi organlarga yuborildi.