Toshkent viloyatining ikkita tuman soliq inspeksiyasiga yangi rahbarlar tayinlandi
2026-06-23 19:50:00 / Qo'mita yangiliklari
Mamlakatimizda davlat boshqaruvi tizimini takomillashtirish, kadrlar siyosati samaradorligini oshirish hamda har bir sohaga zamonaviy bilim va yuqori masʼuliyatga ega rahbar kadrlarni jalb etishga alohida eʼtibor qaratilmoqda.
Ayniqsa, soʻnggi yillarda soliq tizimida amalga oshirilayotgan keng koʻlamli islohotlar sohada ochiqlik, samaradorlik va aholi hamda tadbirkorlarga xizmat koʻrsatish sifatini yangi bosqichga olib chiqishga xizmat qilmoqda.
Shu maqsadda, Soliq qoʻmitasi tomonidan tizimda kadrlar salohiyatini mustahkamlash, rahbar kadrlarning masʼuliyati va tashabbuskorligini oshirishga qaratilgan izchil ishlar davom ettirilmoqda.
Soliq qoʻmitasi Raisining 2026-yil 22-iyundagi buyrugʻiga asosan:
- Abdumominov Gʻayratali Abdulhamid oʻgʻli – Toshkent viloyati Yangiyoʻl tumani soliq inspeksiyasi boshligʻi vazifasini bajaruvchisi etib;
- Xaytboyev Otabek Sunnatovich – Toshkent viloyati Yuqori Chirchiq tumani soliq inspeksiyasi boshligʻi vazifasini bajaruvchisi etib tayinlandi.
Ushbu tayinlovlar soliq organlarida kadrlar siyosatiga berilayotgan yuksak eʼtibor, professional, tashabbuskor va masʼuliyatli rahbarlarni qoʻllab-quvvatlashga qaratilgan islohotlarning amaliy ifodasidir.
Yangi rahbarlarning bilim va tajribasi hududlarda soliq maʼmuriyatchiligini yanada takomillashtirish, soliq toʻlovchilarga qulay shart-sharoitlar yaratish, tadbirkorlik subyektlari bilan samarali muloqotni yoʻlga qoʻyish hamda belgilangan vazifalarni sifatli amalga oshirishga munosib hissa qoʻshishiga ishonch bildiriladi.
Yangi vazifaga tayinlangan rahbarlarga masʼuliyatli faoliyatlarida muvaffaqiyat, mustahkam sogʻliq va yuksak natijalar tilaymiz.