Kichik biznes uchun yaratilgan yangi imkoniyatlar tadbirkorlar ishtirokida muhokama qilindi
2026-06-03 15:25:00 / Qo'mita yangiliklari
Poytaxtimizdagi Sarbon universitetida Oʻzbekiston Respublikasi Prezidentining 2026-yil 26-mayda qabul qilingan “Kichik biznes subyektlarining oʻsishi uchun yanada qulay iqtisodiy va maʼmuriy shart-sharoitlar yaratish toʻgʻrisida”gi PF–100-son Farmonining mazmun-mohiyatiga bagʻishlangan ochiq muloqot tashkil etildi.
Tadbirda Soliq qoʻmitasi mutasaddilari, tadbirkorlar hamda ommaviy axborot vositalari vakillari ishtirok etdi.
Muloqot davomida Farmon bilan joriy etilgan quyidagi muhim yangiliklarga to‘xtalib o‘tildi:
Xususan, 2026-yil 1-iyundan boshlab:
- kichik biznes uchun umumiy soliq rejimiga oʻtish chegarasi 1 mlrd soʻmdan qariyb 5 mlrd soʻmga oshirilishi;
- import qiluvchi kichik biznes subyektlarini majburiy tartibda QQS toʻlovchisi sifatida roʻyxatga olish amaliyoti bekor qilinishi;
- umumiy ovqatlanish, savdo va xizmat koʻrsatish sohalari uchun QQSning soddalashtirilgan 6 foizlik tartibi joriy etilishi, shuningdek, tadbirkorlikni qoʻllab-quvvatlashga qaratilgan qoʻshimcha yengilliklar haqida batafsil maʼlumot berildi.
Ishtirokchilarga mazkur yangiliklar biznesni kengaytirish, qonuniy va shaffof faoliyat yuritish hamda ortiqcha maʼmuriy yukni kamaytirishga xizmat qilishi taʼkidlandi.
Ochiq muloqot savol-javoblar tarzida oʻtib, tadbirkorlarni qiziqtirgan masalalar yuzasidan atroflicha tushuntirishlar berildi.