Ijtimoiy tarmoqlarda davlat soliq xizmati organlaridagi rahbar kadrlar tayinlovlari yuzasidan turli fikr va munosabatlar bildirilmoqda
2026-05-14 18:25:00 / Qo'mita yangiliklari
Avvalo, bir jihatni alohida taʼkidlash lozim: davlat soliq xizmati tizimidagi har qanday tayinlovlar Oʻzbekiston Respublikasi Prezidentining farmon va qarorlari, shuningdek amaldagi qonunchilik talablari asosida amalga oshiriladi. Bu jarayon muayyan mezonlar, kasbiy talablar, xizmat faoliyati natijalari va boshqaruv salohiyatidan kelib chiqqan holda shakllantiriladi.
Yaʼni, rahbarlik lavozimi — tasodif yoki subyektiv munosabat mahsuli emas. Har bir qaror ortida kadrning tajribasi, masʼuliyati, hududni bilishi, islohotlarni amalga oshirish qobiliyati va davlat oldidagi vazifalarni samarali bajara olish salohiyati turadi.
Bugun soliq tizimi oldida mutlaqo yangi vazifalar turibdi. Endigi asosiy maqsad — faqat nazorat qiluvchi emas, balki tadbirkor va soliq toʻlovchilarga koʻmaklashuvchi, zamonaviy servis xizmatiga aylangan tizimni shakllantirishdan iborat.
Shu nuqtayi nazardan, kadrlar siyosati ham “tekshiruvdan — servisga” tamoyili asosida qayta shakllantirilmoqda. Bu jarayonda bilimli, tashabbuskor, natija uchun javob bera oladigan rahbar kadrlarga ustuvor ahamiyat qaratilmoqda.
Ayrim muhokamalarda rahbarlarning yoshiga urgʻu berilayotgani ham kuzatilmoqda. Vaholanki, davlat xizmatida insonning yoshi emas, uning salohiyati, tajribasi, fidoyiligi va natija koʻrsata olishi hal qiluvchi mezon hisoblanadi. Koʻp yillik amaliy tajribaga ega rahbarlar bugungi murakkab iqtisodiy jarayonlarda tizim barqarorligi va samaradorligini taʼminlashda muhim oʻrin tutadi.
Shu bilan birga, soliq organlarida yosh va istiqbolli kadrlarni tayyorlash, ularni rahbarlikka bosqichma-bosqich olib chiqish siyosati ham izchil davom etmoqda. Bugun tizimda yangi avlod vakillarining faol ishtiroki bu boradagi ishlarning amaliy natijasidir.
Eng muhimi, davlat soliq xizmati organlari barcha kuch va imkoniyatlarini iqtisodiyotda shaffoflikni taʼminlash, yashirin iqtisodiyotni qisqartirish, tadbirkorlikni qoʻllab-quvvatlash va byudjet tushumlarini barqaror oshirishdek ustuvor vazifalarga safarbar etgan.
Islohotlar davom etadi. Chunki Yangi Oʻzbekistonda samarali, adolatli va xalqqa xizmat qiluvchi davlat boshqaruvini shakllantirish — barchamizning umumiy maqsadimizdir.