Soliq tizimini modernizatsiya qilish yo‘lida xalqaro hamkorlik: Jejudagi muhim muloqotlar

Koreya Respublikasining Korea National Tax Service taklifiga binoan, O‘zbekiston Respublikasi Soliq qo‘mitasi delegatsiyasi hozirda Jeju shahrida xizmat safarida bo‘lib turibdi.

Mazkur tashrifdan ko‘zlangan asosiy maqsad — soliq ma’muriyatchiligi sohasida, ayniqsa soliq to‘lovchilarga xizmat ko‘rsatish tizimi hamda professional ta’lim va kadrlar tayyorlash yo‘nalishlarida ilg‘or tajribalarni o‘rganish, o‘zaro bilim almashinuvini yanada chuqurlashtirishdan iborat. 

Shu bilan birga, ikki mamlakat soliq tizimlarining ta’lim muassasalari o‘rtasida barqaror va samarali hamkorlik aloqalarini yo‘lga qo‘yishga alohida e’tibor qaratilmoqda.

Ma’lumki, 2030 yilgacha bo‘lgan davrda O‘zbekiston soliq tizimini tubdan takomillashtirishga qaratilgan strategiya loyihasi O‘zbekiston Respublikasi Prezidentiga taqdim etilgan bo‘lib, davlat rahbari mazkur takliflarni qo‘llab-quvvatlagan holda, ayniqsa soliq tizimida ta’lim sohasini rivojlantirish va kadrlar salohiyatini oshirish yuzasidan qimmatli fikr va tavsiyalarini bildirgan. 

Bugungi kunda ushbu ustuvor vazifalarni sifatli va samarali amalga oshirish bo‘yicha tizimli ishlar izchil olib borilmoqda.

Ushbu nuqtai nazardan qaraganda, rivojlangan davlatlar, xususan Koreya Respublikasining ilg‘or tajribasini o‘rganish milliy soliq tizimini modernizatsiya qilishda muhim ahamiyat kasb etadi.

Tashrifning birinchi kunida Koreya milliy soliq tizimida joriy etilgan samarali qayta aloqa mexanizmlari, xodimlar malakasini oshirish tizimi hamda ularning ish samaradorligini baholashning zamonaviy yondashuvlari atroflicha muhokama qilindi. 

Ushbu muloqotlar o‘zaro tajriba almashish, amaliy yechimlar ishlab chiqish va kelgusidagi hamkorlik yo‘nalishlarini belgilab olishda muhim qadam bo‘lib xizmat qilmoqda.