"E-ijara" orqali ijara bo‘yicha JShODS hisobotini topshirish tartibi soddalashtirildi
2026-05-01 17:45:00 / Qo'mita yangiliklari
"E-ijara" orqali ijara bo‘yicha JShODS hisobotini topshirish tartibi soddalashtirildi
Avval xabar berilganidek, Soliq qoʻmitasi huzuridagi Jamoatchilik kengashi, “Ochiq eshiklar kuni” formatida hisobchilar va soliq maslahatchilari ishtirokida tashkil etilgan uchrashuvda jismoniy shaxslardan olinadigan daromad soligʻi (JShODS) boʻyicha hisobotni proaktiv topshirish masalalari muhokama qilingan edi.
Xususan, mulk ijaraga olingan har bir hudud kesimida xisobot tashkilot roʻyxatdan oʻtgan joy boʻyicha taqdim etilishi va har bir tumanga alohida hisobot topshirish talab etilmasligi qayd etilgan.
Bu borada Soliq qoʻmitasi jismoniy shaxslardan olinadigan daromad soligʻi va ijtimoiy soliq hisob-kitobining “Mol-mulkni ijaraga beruvchi jismoniy shaxslar uchun belgilangan ijara toʻlovining eng kam miqdori maʼlumotnoma-hisob-kitobi” 3-ilovasini proaktiv tarzda shakllantirish imkoniyatini yaratdi (yangi paket kodi 11104_1).
Mazkur hisobot bilan soliq agentlari tomonidan “E-ijara” ATda hisobga qoʻyilgan ijara shartnomalari toʻgʻrisidagi maʼlumotlar har bir tuman (shahar) kesimida soliq toʻlovchi hisobga qoʻyilgan joy boʻyicha avtomat shakllantiriladi.
Shu munosabat bilan, jismoniy shaxslardan olinadigan daromad soligʻi va ijtimoiy soliq hisob-kitobining 070 va 071-satrlari hamda 3-ilovasida maʼlumotlar shakllanmasligi maʼlum qilinadi (paket raqami 11101_20).
Eslatma! jismoniy shaxslardan olinadigan daromad soligʻi va ijtimoiy soliq hisob-kitobining 5-ilovasida “E-ijara” ATda hisobga qoʻyilgan jismoniy shaxslardan ijaraga olingan mol-mulklari boʻyicha maʼlumotlar kiritilmaydi.
Hisob-kitobni toʻldirish boʻyicha qoʻllanmalar ilova qilinadi.