Buyuk sarkarda va davlat arbobi Amir Temur nafaqat milliy davlatchiligimiz, balki jahon tamadduni tarixida ham beqiyos oʻrin egallagan. 

U zot nafaqat Temuriylar saltanati, balki Ikkinchi Uygʻonish davriga asos solib, ilm-fan, madaniyat tamaddunida tub burilishni boshlab berdi. 

Mustaqillik yillarida ulugʻ ajdodimizning muborak nomi va boy merosi tarixiy adolat asosida qayta tiklanib, xalqimizning maʼnaviy hayotida mustahkam oʻrin egalladi. Bugungi kunda Amir Temur siymosi milliy oʻzlikni anglash, anʼana va qadriyatlarimizni asrab-avaylashda beqiyos maʼnaviy kuch manbai sifatida namoyon boʻlmoqda.

Yurtimizda Temuriylar tarixi davlat muzeyi, Xalqaro Amir Temur jamoat fondi kabi muassasalar faoliyati, shuningdek, «Amir Temur» ordeni taʼsis etilgani buyuk ajdodimiz xotirasiga koʻrsatilayotgan yuksak ehtirom ifodasidir.

Ayni paytda mamlakatimiz Uchinchi Renessans poydevorini barpo etish sari dadil qadam tashlayotgan bir sharoitda Amir Temurning davlat boshqaruvi borasidagi ulkan tajribasi biz uchun muhim ilmiy-amaliy ahamiyat kasb etmoqda. Shu maʼnoda, Soliq qoʻmitasi tashabbusi bilan oʻtkazilayotgan ilmiy-amaliy tadbirlar, xususan, Samarqand shahrida tashkil etilgan “Amir Temur va Temuriylar davrida soliq tizimi – Amir Temurning davlat boshqaruvida lavozimlarga munosib kishilarni tanlash siyosati” mavzusida ilmiy-amaliy konferensiya ham ana shu boy merosni chuqur oʻrganish va amaliyotga tatbiq etishda yanada ahamiyatli boʻldi.

Sohibqiron Amir Temurning hayoti va faoliyati, uning davlatchilik anʼanalari, adolat va taraqqiyot tamoyillari bugungi Yangi Oʻzbekiston bunyodkorlari uchun muhim dasturilamal boʻlib xizmat qiladi. 

Soliq qoʻmitasi Matbuot xizmati