Turli hududlarda joylashgan jismoniy shaxslarning ijaraga olingan mulki boʻyicha JShODS hisoboti qanday taqdim etiladi?

Jismoniy shaxslar tomonidan mulkni ijaraga berishdan olingan daromadlar boʻyicha jismoniy shaxslar daromad soligʻi (JShODS) toʻliq hajmda tuman va shaharlar budjetlariga yoʻnaltiriladi.
Oʻzbekiston Respublikasining “2026-yil uchun Davlat budjeti toʻgʻrisida”gi Qonuni 12-moddasi 

Bu amaliyotda nimani anglatadi?

Agar yuridik shaxs turli hududlarda joylashgan jismoniy shaxslardan mulk ijaraga olsa, soliq agenti sifatida ushlab qolingan JShODS boʻyicha hisobotni ijaraga olingan mulk joylashgan hudud boʻyicha taqdim etishi lozim. Bunda “filialsiz” maqom tanlanadi.

Misol uchun, yuridik shaxs Toshkent shahar Shayxontohur tumanidan roʻyxatdan oʻtgan boʻlib, 10 nafar ishchisi mavjud. Ijaraga olingan noturar joyi Buxoro viloyati Buxoro shahrida joylashgan hamda ijaraga olingan transport vositasining egasi Qashqadaryo viloyati Qarshi shahrida doimiy roʻyxatda turadi.

Bu holatda soliq agenti hisobotni alohida shakllantiradi:

Buxoro shahrida — noturar bino ijarasi boʻyicha;

Qarshi shahrida — transport vositasi ijarasi boʻyicha (ijara beruvchining roʻyxatdan oʻtgan joyi boʻyicha).

Bunda, hisob-kitobning 5-ilovasida mol-mulkni ijaraga berishdan olingan daromadlarga toʻlov manbaida ushlab qolingan soliqlar jismoniy shaxslar kesimida koʻrsatiladi.

Shayxontohur tumaniga hisob-kitobning 4-ilovasida faqatgina xodimlarga hisoblangan mehnatga haq toʻlash tarzidagi daromadlar shakllantiriladi. Bunda, hisob-kitobning 5-ilovasiga  boshqa hududlarda ijaraga olgan mol-mulklari boʻyicha maʼlumotlar shakllantirilmaydi.

Muhim. Soliq agentlari ijaradan olingan daromad bo‘yicha to‘lov manbaida soliq hisoblaganda 5-ilovaning 7-ustuniga “2 - mol-mulkni ijaraga berishdan daromad”ni tanlashi lozim.

Eslatib oʻtamiz: 16-fevral – 2025-yil hamda yanvar oyi uchun JShODS va ijtimoiy soliq hisobotlarini taqdim etishning oxirgi muddati.

Jismoniy shaxslarning daromad solig‘i ma’muriyatchiligi boshqarmasi