3-dekabr – Xalqaro nogironlar kuni. 

Bu sana jamiyatimizga yana bir bor shuni eslatadiki, har bir inson eʼtibor, mehr va qoʻllab-quvvatlashga loyiq. Eng muhimi – barcha uchun teng imkoniyatlar yaratilishi kerak.
Oʻzbekistonda nogironligi boʻlgan shaxslarni har tomonlama qoʻllab-quvvatlash va ularning hayot sifatini oshirishga qaratilgan bir qator soliq imtiyozlari ham joriy qilingan.

Masalan, urush nogironlari mulk va yer soligʻidan toʻliq ozod etilgan. Shuningdek, ular daromad soligʻini qisman toʻlamaydilar – yaʼni ular daromadidan mehnatga haq toʻlashning eng kam miqdorining 1,41 barobari taxminan 1 mln 800 ming soʻmi soliqdan ozod qilinadi. Bu imtiyoz jismoniy shaxslardan olinadigan daromad soligʻi boʻyicha qoʻshimcha parvarishga muhtoj bolani tarbiyalayotgan ota-onaning biriga ham tatbiq etiladi.

I va II guruh nogironligi boʻlgan shaxslar ham bir qator soliq imtiyozlariga ega. Ular yer soligʻini toʻlamaydilar, shuningdek, umumiy maydoni 60 kv.m gacha boʻlgan yashash xonadonlari mulk soligʻidan ozod etilgan. Bundan tashqari, ularning mehnatga haq toʻlashning eng kam miqdorining 3 baravarigacha, yaʼni taxminan 3 813 000 soʻmgacha boʻlgan daromad qismi soliqdan ozod etilgan. Agar daromad shu miqdordan oshsa, soliq faqat oshgan qismga hisoblanadi.

Ushbu imtiyozlar nogironligi boʻlgan shaxslarning ijtimoiy himoyasini kuchaytirish, ularga yanada koʻproq imkoniyat yaratish va jamiyat hayotida faol ishtirok etishiga sharoit yaratishga xizmat qiladi.

Soliq qoʻmitasi Matbuot xizmati