Navoiyda tarixiy yutuq: ilk bor jigar transplantatsiyasi muvaffaqiyatli amalga oshirildi
2026-03-10 14:40:00 / Yangiliklar
Bu voqea — nafaqat bir bemor hayotini saqlab qolish, balki butun Navoiy viloyati sog‘liqni saqlash tizimi uchun yangi bosqichning boshlanishidir.
Bemor 1983 yilda tug‘ilgan bo‘lib, uzoq yillar davomida jigar sirrozi bilan og‘rib kelgan. Kasallik og‘irlashib, jigar yetishmovchiligiga olib kelgan. Konservativ davolash usullari samara bermagani sababli transplantatsiya yagona umidga aylandi.
Donor — bemorning ayoli (1983 yilda tug‘ilgan). Operatsiyadan oldin har ikkisi chuqur va bosqichma-bosqich tekshiruvlardan o‘tkazildi. Barcha laborator tahlillar, KT va MRT tekshiruvlari, qon guruhi va to‘qima mosligi aniqlandi, kardiologik va anesteziologik baholashlar amalga oshirildi. Ko‘p tarmoqli konsilium ijobiy xulosa berdi.
Operatsiya 12 soat davom etdi.
Ikkita operatsiya brigadasi bir vaqtning o‘zida ishladi:
— biri donordan jigarning bir qismini ajratib oldi;
— ikkinchisi resipiyentga transplantatsiyani amalga oshirdi.
Bu yuqori darajadagi mahorat, aniqlik va xalqaro transplantologiya standartlariga qat’iy rioya qilishni talab qildi.
Ayni vaqtda donor va resipiyentning ahvoli barqaror:
Gemodinamik ko‘rsatkichlar barqaror
Transplantat funksiyasi qoniqarli
Doimiy tibbiy nazorat ostida
Bu shunchaki bir operatsiya emas. Bu — Navoiy viloyatida to‘liq shakllangan transplantatsiya dasturining boshlanishi.
Bu — shifokorlarimiz salohiyati, jamoaviy mehnat va inson hayotiga bo‘lgan yuksak mas’uliyatning yorqin ifodasidir.