Vazirlar Mahkamasining “Yer osti suvlariga quduqlarni burgʻilash va ulardan foydalanish munosabatlarini tartibga solishni yanada takomillashtirish chora-tadbirlari toʻgʻrisida”gi qarori mazmun-mohiyati mavzusida matbuot anjumani
2024-02-01 17:50:00 / Matbuot anjumanlari
Unda Tog‘-kon sanoati va geologiya vazirligi bo‘lim boshlig‘i N.Po‘latov, Davlat geologik monitoring xizmati boshligʻi R.Begmatov va ommaviy axborot vositalari vakillari ishtirok etishdi.
Nurbek Po‘latov Oʻzbekiston Respublikasi Vazirlar Mahkamasining 2023 yil 28 dekabrdagi 685-son qarori bilan yer osti suv olish inshootlarini suv hisoblash vositalari bilan jihozlash tartibi va Xavfli geologik jarayonlarning davlat monitoringi toʻgʻrisidagi nizomlar tasdiqlanganligi hamda Yer osti suvlariga quduq burgʻilash faoliyatiga ruxsatnomani “Litsenziya” axborot tizimi orqali berish tartibi belgilanganini ta’kidladi.
Shuningdek, soʻnggi yillarda yer osti suvlaridan samarasiz foydalanish natijasida respublikaning 18 tumanida yer osti suvlari sathi 5 metrgacha, 10 tumanida esa 5 metrdan ortiq tushib ketishi holati kuzatilgani, yer osti suvlarini aniq hisobini yuritish maqsadida yer osti suv olish inshootlariga suv hisoblash vositalarini oʻrnatish majburiyati yuklanayotgani, bunda jismoniy shaxslarning shaxsiy va xoʻjalik ehtiyoji uchun yakka tartibda sutkasiga 5 metr kubgacha boʻlgan miqdorda yer osti suvlarini olish mustasno ekanligi qayd etildi.
Rasuljon Begmatov hozirgi kunda respublikaning togʻ va togʻoldi hududlarida xavfli ekzogen geologik jarayonlar sodir boʻlishi mumkin boʻlgan jami 844 ta obyektlar aniqlangani, shularni inobatga olgan holda aniq mexanizmlarga asoslangan Xavfli geologik jarayonlarning davlat monitoringi nizomi ishlab chiqilib, tasdiqlanganini ma’lum qildi.
Tadbir davomida spikerlar tomonidan ishtirokchilarni qiziqtirgan, shu bilan birga ijtimoiy tarmoqlar orqali kelib tushgan savollarga javoblar qaytarildi.
Shuningdek, joriy yil mart oyida Togʻ-kon sanoati va geologiya vazirligi, uning tizimosti korxona hamda tashkilotlarida 2023-yilda amalga oshirilgan ishlar, erishilgan natijalar, 2024-yilda rejalashtirilgan loyihalar yuzasidan O‘zbekiston Milliy matbuot markazi binosida matbuot anjumani, 2023-yil hisobotining keng jamoatchilik ishtirokidagi muhokama etilishi rejalashtirilgani e’lon qilindi.
