Oliy Majlis Qonunchilik palatasining Ekologiya va atrof-muhitni muhofaza qilish masalalari qoʻmitasi deputatlari vazirlik tizimosti korxonalari faoliyati bilan tanishdilar
2026-10-21 15:15:00 / Yangiliklar
Deputatlar bilan davra suhbatida yer osti suv resurslarini muhofaza qilish va ulardan oqilona foydalanish borasida amalga oshirilayotgan ishlar, sohadagi mavjud muammolar va ularning yechimlari muhokama qilindi.
Qoʻmita va Vazirlik oʻrtasida oʻzaro hamkorlik toʻgʻrisidagi memorandum imzolandi. Mazkur hujjat yer osti suvlaridan oqilona foydalanish va ularni muhofaza qilish sohasida qonunchilikni takomillashtirish, nazorat-tahlil tadbirlarini hamkorlikda tashkil etish, huquqbuzarliklarning oldini olish va ularni bartaraf etish boʻyicha takliflar ishlab chiqishga qaratilgan.
Muhokamalarda qoʻmitaning 2026-yil 21-aprelda Samarqand va Navoiy viloyatlari misolida yer osti suvlaridan oqilona foydalanish va ularni muhofaza qilish masalalari yuzasidan oʻtkazilgan nazorat-tahlil tadbirlari natijalari boʻyicha qabul qilingan qarori ijrosi doirasida amalga oshirilgan chora-tadbirlar yuzasidan tayyorlangan tahliliy maʼlumotlar taqdim etildi. Ularda amalga oshirilgan ishlar, erishilgan natijalar va mavjud muammolarga eʼtibor qaratildi.
Shuningdek, deputatlarga “Yer qaʼridan foydalanish markazi” davlat muassasasi hamda Togʻ-kon sanoati va geologiya sohasini nazorat qilish inspeksiyasi faoliyati bilan tanishdilar. Yer qaʼri uchastkalarini auksionga chiqarish, ruxsatnomalar berish tizimi, nazorat mexanizmlari va tadbirkorlar uchun yaratilgan imkoniyatlar haqida ma’lumot berildi.
Bundan tashqari “Oʻzbekgidrogeologiya” davlat muassasasida yerosti suvlari va xavfli geologik jarayonlar davlat monitoringi, hududiy gidrogeologiya stansiyalari faoliyati, situatsion markaz imkoniyatlari, ruxsatnomalar berish tizimi hamda tegishli vazirlik va idoralar bilan axborot almashinuvi masalalari muhokama qilindi.
“GIDROINGEO instituti” DM ilmiy-tadqiqot laboratoriyalari, yerosti suvlarini raqamlashtirish va modellashtirish ishlari hamda kimyoviy laboratoriya tahlillari haqida taqdimot qilindi. Tashrif dasturi doirasida Davlat geologiya muzeyiga ekskursiya ham tashkil etildi.