O‘zbekiston Respublikasi Tog‘-kon sanoati va geologiya vazirligi

Tadbir davomida sohani raqamli transformatsiya qilish, zamonaviy raqamli yechimlar va sun’iy intellekt texnologiyalarini tizim korxonalari faoliyatiga joriy etishning dolzarb masalalari ko‘rib chiqildi. Ishlab chiqarish va boshqaruv jarayonlarini raqamlashtirish, geologik ma’lumotlar bilan ishlashni takomillashtirish hamda geologiya-qidiruv ishlarining samaradorligini oshirishga qaratilgan loyihalarni amalga oshirish masalalariga alohida e’tibor qaratildi.

Vazir o‘z so‘zida sohani muvaffaqiyatli raqamli transformatsiya qilish tizimdagi barcha korxona va tashkilotlarning o‘zaro hamjihatlikdagi faoliyati, boshqaruvning zamonaviy yondashuvlarini joriy etish hamda raqamli yechimlardan samarali foydalanishni talab etishini ta’kidladi.

Shuningdek, Vazirlik huzurida yangi Raqamli transformatsiya markazi tashkil etilishi haqida ma’lumot berildi. Jamoaga Markaz rahbari O. Fayzullayev tanishtirildi. U bir vaqtning o‘zida vazir o‘rinbosari maqomida faoliyat yuritadi. O. Fayzullayev mazkur lavozimga qadar “Olmaliq KMK” AJning 3-mis boyitish fabrikasi raqamlashtirish bo‘yicha direktor o‘rinbosari lavozimida faoliyat yuritgan.

Markaz zimmasiga sohani raqamli transformatsiya qilish bo‘yicha loyihalarni muvofiqlashtirish, zamonaviy axborot texnologiyalarini joriy etish, raqamli infratuzilmani rivojlantirish hamda ishlab chiqarish va boshqaruv jarayonlarida sun’iy intellekt texnologiyalarini qo‘llash vazifalari yuklatildi.

Yig‘ilish yakunida kelgusidagi ishlarning ustuvor yo‘nalishlari belgilab olindi hamda Vazirlik oldiga qo‘yilgan vazifalarning o‘z vaqtida ijrosini ta’minlash yuzasidan tegishli topshiriqlar berildi.