Mineral resurslar instituti bir qator yo‘nalishlarda Xitoy kompaniyasi bilan hamkorlik qiladi
2026-06-25 16:35:00 / Yangiliklar
“Mineral resurslar instituti” davlat muassasasi vakillari hamda Xitoy Xalq Respublikasining “Shensi yadro sanoati guruhi” tarkibiga kiruvchi “218-brigada” MChJ delegatsiyasi o‘rtasida o‘zaro hamkorlikni yo‘lga qo‘yish masalalariga bag‘ishlangan uchrashuv bo‘lib o‘tdi.
Uchrashuvda geologiya, ilmiy-tadqiqot, innovatsion texnologiyalarni joriy etish, mutaxassislar salohiyatini rivojlantirish hamda qo‘shma ilmiy-amaliy loyihalarni amalga oshirish istiqbollari muhokama qilindi.
Shuningdek, tomonlar mutaxassislar malakasini oshirish, zamonaviy innovatsion texnologiyalarni o‘zlashtirish va ishlab chiqarish jarayonlariga tatbiq etish, ilmiy-tadqiqot ishlarini birgalikda olib borish, shuningdek, qo‘shma laboratoriya tashkil etish kabi masalalar yuzasidan fikr almashdi. Tadbir yakunida ikki tomon o‘rtasida O‘zaro anglashuv memorandumi imzolandi.