Kon-geologiya vazirligining korrupsiyaga qarshi kurashishdagi ilg‘or tajribasi VI Toshkent aksilkorrupsiya forumida e’tirof etildi
2026-05-12 16:15:00 / Yangiliklar
“Korrupsiyaga qarshi boshqaruvning yangi arxitekturasi: samarali preventiv choralar sari” shiori ostida o‘tayotgan mazkur tadbirda Tog‘-kon sanoati va geologiya vazirligi korrupsiyaga qarshi kurashishdagi ilg‘or tajribasi e’tirof etilib, “Komplayens-nazorat” tizimini samarali joriy etgan tashkilot sifatida maxsus mukofot bilan taqdirlandi.
Bu yilgi Forum dasturidan yuqori darajadagi plenar sessiya, shuningdek, institutsional ochiqlik va hisobdorlik, hududiy va mahalliy darajada korrupsiyaning oldini olish mexanizmlari, korrupsiyaga qarshi taʼlim va jamoatchilik ishtirokini kuchaytirishga bag‘ishlangan uchta tematik muhokama o‘rin olgan.
Aksilkorrupsiya forumi Korrupsiyaga qarshi kurashish agentligi va Korrupsiyaga qarshi kurashish milliy kengashi tomonidan Osiyo taraqqiyot banki (ADB), Germaniya xalqaro hamkorlik jamiyati (GIZ) GmbH, Yevropa Ittifoqi (EU) hamda Birlashgan Millatlar Tashkiloti Taraqqiyot dasturi (UNDP) yirik xalqaro hamkorlar ko‘magida tashkil etildi.
Unda Yaponiya, Malayziya, Singapur, Xitoy, Saudiya Arabistoni, Moldova, Estoniya, Litva, Ozarbayjon va Tojikiston kabi 10 dan ortiq mamlakatlarning korrupsiyaga qarshi kurashish idoralari rahbarlari va mutaxassislari, shuningdek, Yevropa Ittifoqi, Iqtisodiy hamkorlik va taraqqiyot tashkiloti, Osiyo taraqqiyot banki, Yevropada xavfsizlik va hamkorlik tashkiloti hamda BMT tuzilmalarining yetakchi ekspertlari, shuningdek, davlat organlari hamda fuqarolik jamiyati institutlarining vakillari, jumladan Tog‘-kon sanoati va geologiya vazirligi, uning tizimosti korxonalarining korrupsiyaga qarshi kurashish bo‘yicha tuzilmalar rahbarlari ishtirok etmoqda.