Yangi turdagi litsenziyalarni joriy etishni nazarda tutuvchi qonun qabul qilindi
2026-01-16 17:45:00 / Yangiliklar
2026-yil 15-yanvarda O‘zbekiston Respublikasining “Bozor islohotlari va Oʻzbekistonning Jahon savdo tashkilotiga aʼzo boʻlish jarayonlari yanada jadallashtirilishi munosabati bilan Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish toʻgʻrisida”gi Qonuni qabul qilindi.
Mazkur qonunga muvofiq O‘zbekiston Respublikasining “Litsenziyalash, ruxsat berish va xabardor qilish tartib-taomillari to‘g‘risida”gi Qonuniga o‘zgartirishlar kiritilib, litsenziyalanadigan faoliyatning yangi turlari joriy etildi.
Jumladan, qora metall parcha va chiqindilarini tayyorlash (xarid qilish), qayta ishlash va realizatsiya qilish, shuningdek rangli metall parcha va chiqindilarini tayyorlash (xarid qilish), qayta ishlash va realizatsiya qilish faoliyatini litsenziyalash belgilandi.
Qonun metall parcha va chiqindilar aylanmasi sohasidagi faoliyatni tartibga solish, bozor shaffofligini oshirish hamda ushbu sohada davlat tomonidan tartibga solishni takomillashtirishga qaratilgan.