O‘zbekiston mutaxassislari Italiyada seysmik himoya bo‘yicha ilg‘or tajribani o‘rganmoqda
2026-06-22 15:40:00 / Vazirlik yangiliklar
Qurilish va uy-joy kommunal xo‘jaligi vazirligi hamda uning tizim tashkilotlari vakillari Italiya Respublikasida tashkil etilgan “O‘zbekistondagi bino va inshootlarni seysmik himoyalash qurilmalarini loyihalashtirish bo‘yicha Italiya tajribasi” mavzusidagi malaka oshirish dasturida ishtirok etmoqda.
O‘quv dasturi doirasida ishtirokchilar bino va inshootlarning zilzilabardoshligini ta’minlash, zamonaviy seysmik izolyatsiya tizimlarini qo‘llash, nochiziq tahlil usullaridan foydalanish hamda hududiy akselerogrammalar asosida loyihalash bo‘yicha ilg‘or xalqaro tajribalar bilan tanishmoqda.
Shuningdek, dastur davomida Yevropaning seysmik himoya texnologiyalari sohasidagi yetakchi kompaniyalaridan biri — "FIP MEC" faoliyati, kompaniya tomonidan amalga oshirilayotgan yirik loyihalar va innovatsion muhandislik yechimlari o‘rganilyapti. Mutaxassislar korxonaning ilmiy-sinov laboratoriyalari hamda ishlab chiqarish maydonlarida bo‘lib, zamonaviy seysmik izolyatorlar, jumladan, "Friction Pendulum Isolator" qurilmalarini ishlab chiqarish va ularni dinamik sinovdan o‘tkazish jarayonlarini bevosita kuzatmoqda.
Mazkur malaka oshirish dasturi mamlakatimizda qurilish obyektlarining seysmik xavfsizligini yanada mustahkamlash, ilg‘or xalqaro tajriba va zamonaviy muhandislik yechimlarini amaliyotga keng joriy etish, shuningdek, soha mutaxassislarining kasbiy salohiyatini oshirishga xizmat qiladi.