O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

Tanlov muddat: 15.07.2025 23:55

Rossiya Federatsiyasi Fan va oliy taʼlim vazirligi bilan hamkorlikda ilmiy faoliyatga oid davlat dasturlari doirasida bajariladigan amaliy tadqiqot va innovatsion loyihalarini qabul qilish uchun “Oʻzbekiston- Rossiya” xalqaro qoʻshma tanlovi eʼlon qilinmoqda.

Tanlovga kelib tushgan loyihalar O‘zbekiston Respublikasi Vazirlar Mahkamasining “Ilmiy-tadqiqot va innovatsion faoliyatni rivojlantirishning normativ-huquqiy bazasini yanada takomillashtirish chora-tadbirlari to‘g‘risida” 2020-yil 9-martdagi 133-son qarorda belgilangan talablarga muvofiq quyidagi fan yoʻnalishlari boʻyicha eʼlon qilinadi:

Т/r.	Rossiya tomonidan hamkor tashkilot loyihalarining fan yo‘nalishlari	O‘zbekiston tomonidan qabul qilinadigan loyihalarning fan yo‘nalishlari
Amaliy tadqiqotlar va innovatsion loyihalar                                                                                (bajarilishi 2 yilgacha bo‘lgan)
1.	Fizika va astrofizika	Matematika, fizika va mexanika fanlari
2.	Matematika	Matematika, fizika va mexanika fanlari
3.	Materialshunoslik	Texnika fanlari
		Matematika, fizika va mexanika fanlari
		Kimyo fanlari, kimyoviy texnologiya va nanotexnologiya fanlari
4.	Qishloq xo‘jaligi va oziq-ovqat xavfsizligi	Qishloq xoʻjaligi fanlari
5.	Ijtimoiy va gumanitar fanlar	Huquq fanlari
		Iqtisodiyot fanlari
		Tarix va arxeologiya fanlari
		Filologiya va ijtimoiy fanlar
		Pedagogika va psixologiya fanlari

 

Loyiha taqdim qilinganda loyiha rahbari oʻz loyihasi tadqiqot yoʻnalishidan kelib chiqib Oliy ta’lim, fan va innovatsiyalar vazirligi huzuridagi Ilmiy-texnik kengash yoʻnalishini tanlashi va shu yoʻnalish boʻyicha taqdim qilishi lozim.

Tanlovda ishtirok etish istagini bildirgan ilmiy jamoa Rossiya tomonidan loyihani amalga oshirish boʻyicha hamkor topishlari va ikki tomonda eʼlon qilingan tanlov shartlari boʻyicha bir xil mavzuga mos loyihalarni taqdim qilishlari lozim. Tanlovning barcha bosqichlarida ikki tomondan ham ijobiy natijaga ega loyihalargina keyingi bosqichga oʻtkaziladi.

Tanlovga taqdim etiladigan ilmiy loyihalar davlat ilmiy dasturlarining yagona intellektual elektron platformasi (loyiha.ilmiy.uz) orqali 2025-yil 20-maydan 15-iyulga qadar faqat elektron shaklda qabul qilinadi.

Loyihani rasmiylashtirish shakli bilan tanishish uchun bu yerni bosing.

Tanlov shartlari.

1. Loyihani amalga oshirish boshlangan vaqtda tuzilgan ilmiy jamoaning o‘rtacha yoshi, qoida tariqasida, 45 yoshdan oshmasligi kerak. (Ilmiy jamoaning o‘rtacha yoshi barcha ijrochilarning yoshini o‘rtacha arifmetik qiymati sifatida hisoblanadi).

2. Tanlovda ilmiy-tadqiqotlar oʻtkazish uchun imkoniyati va salohiyati mavjud ilmiy faoliyat subyektlari ishtirok etishi mumkin. Ilmiy faoliyat asosiy faoliyat turiga kirmaydigan tashkilotlar tomonidan taqdim etilgan loyihalar tanlovdan chetlashtiriladi.

3. Loyiha rahbari tomonidan tanlovga faqat bitta loyiha taqdim etilishi mumkin.

Bir vaqtning oʻzida bir turdagi ikkita loyihaga rahbar boʻlishiga yoʻl qoʻyilmaydi va ushbu holatga olib kelishi mumkin boʻlgan loyihalar qabul qilinmaydi.

4. Rossiyadagi hamijrochi tashkilot va loyiha talabnomasi to‘g‘risida ma’lumot 8-shakl sifatida ilova qilinishi lozim.

5. Amaliy tadqiqot va innovatsion loyihalari bo‘yicha ijrochi tashkilot Ilmiy (ilmiy-texnik) kengashi majlisining bayonidan koʻchirmada va loyihaning 4-shaklining 4.6-bandida bajarilishi rejalashtirilgan ilmiy loyiha yakunida qoʻlga kiritiladigan muhim ilmiy natija (yakuniy mahsulot, yangi ishlanma, texnologiya) quyidagi talablarga javob berishi qayd etilishi (asoslab berilishi) lozim:

Amaliy tadqiqotlar - aniq tarmoq yoki muayyan ijtimoiy sohadagi mavjud muammoning ilmiy yechimini taʼminlashga qaratilganligi (yillik talab/ehtiyoj aniq raqamlarda koʻrsatilishi lozim);

innovatsion loyihalar - tijoratlashtirish/joriy etishdan olinadigan aniq iqtisodiy (ijtimoiy/amaliy) samaraning mavjudligi.

 Loyiha natijalari joriy etiladigan ishlab chiqarish korxonalari bilan hamkorlik shakllari va birgalikda bajariladigan ishlar kursatiladi.

6. Tanlovga bajarilishi ikki yilga moʻljallangan amaliy tadqiqot va innovatsion loyihalari qabul qilinadi.

7. Ilmiy loyiha hujjatlarini Davlat ilmiy dasturlarining yagona intellektual elektron platformasi (loyiha.ilmiy.uz) orqali roʻyxatdan oʻtkazish jarayonida quyidagi hujjatlarning elektron nusxalari (pdf/doc) Elektron platformaga yuklanadi:

• ijrochi tashkilotning rahbari tomonidan imzolangan yo‘llanma xat (pdf);
• ijrochi tashkilotning ilmiy (ilmiy-texnik) kengashi qaroridan ko‘chirma (pdf);
• amaliy va innovatsion loyiha matni (imzo va muhr qoʻyilgan holda, pdf va uning matn redaktori dasturidagi (doc/docx) shakli);
• Rossiyadagi hamijrochi tashkilot va loyiha talabnomasi to‘g‘risida ma’lumot (pdf).

8. Taqdim etilgan loyihada keltirilgan ilmiy yangilik, nou-xau va gʻoyalarni ekspertiza jarayonlarida ochiq muhokamaga qoʻyishning maqsadga muvofiqligi toʻgʻrisida ijrochi tashkilot vakolatli tuzilmasining (xizmatining) xulosasi loyihaga ilova qilinishi lozim.

Izoh: ijrochi tashkilot loyihada keltirilgan ilmiy yangilik, nou-xau va g‘oyalarni ekspertiza jarayonlarida ochiq muhokamaga qo‘yilganligi haqida vakolatli tuzilmaning (xizmatning) xulosasi taqdim etilmagan taqdirda, loyiha talabnomasi tanlovdan chetlashtitiladi.

9. Tadqiqot shakli bo‘yicha loyihaning umumiy qiymati quyidagi miqdorlardan oshmasligi lozim:

amaliy tadqiqot loyihasi – bazaviy hisoblash miqdorining (BHM) 6 000 barobarigacha;

innovatsion loyihasi – BHMning 8 000 barobarigacha.

10. Tanlovga taqdim etiladigan loyihani amalga oshirish uchun so‘ralayotgan umumiy moliyalashtirish hajmini (5-shakl) hisoblashda Oliy ta’lim, fan va innovatsiyalar vazirligi tomonidan ushbu havolaga joylashtirilgan hisob-kitob shaklidan foydalanish tavsiya etiladi: http://loyiha.ilmiy.uz/site/example-docs.

Izoh: Loyiha doirasida Rossiyadagi hamkor tomonga xizmat safarlari nazarda tutilishi va ikki yil (24 oy) davomida kamida to‘rt marotaba ammo umumiy hisobda uch oydan (90 kun) oshmasligi lozim.

Tadqiqot natijalari Rossiyadagi hamkor bilan birgalikda har bir tomonda bir yilda kamida bir marotaba tashkil etiladigan va o‘tkaziladigan ilmiy-amaliy anjumanlarda muhokama etilishi rejalashtiriladi.

Eslatma: 

1. Rossiyadagi hamkor tomon bilan birga tadqiqot davomida qo‘shma nashrlar chop etish ko‘zda tutilsin.

2. Tanlovga taqdim etilgan loyihalarning har bir bosqichda koʻrib chiqish natijalari toʻgʻrisidagi maʼlumotlar loyiha rahbarlarining Davlat ilmiy dasturlarining yagona intellektual elektron platformasidagi (loyiha.ilmiy.uz) shaxsiy kabinetlarida koʻrsatiladigan interaktiv xizmati orqali taqdim etib boriladi.

3. Tanlovga kelib tushgan loyihalar Oʻzbekiston Respublikasi Vazirlar Mahkamasining “Ilmiy-tadqiqot va innovatsion faoliyatni rivojlantirishning normativ-huquqiy bazasini yanada takomillashtirish chora-tadbirlari toʻgʻrisida” 2020-yil 9-martdagi 133-son qarorida belgilangan talablarga muvofiq dastlabki texnik ekspertizadan oʻtkaziladi.

4. Tanlovga taqdim etiladigan ilmiy loyihalar loyiha rahbarining yagona identifikatsiya tizimi (id.egov.uz) orqali roʻyxatdan oʻtgan shaxsiy kabineti orqali topshirilishi shart. Loyihaning ijrochilari yoki loyiha rahbari boʻlmagan shaxslar tomonidan taqdim etilgan ilmiy loyihalar tanlovga qabul qilinmaydi.

Ilmiy loyihalarni shakllantirish bilan bogʻliq masalalar boʻyicha Innovatsion rivojlanish agentligi masʼul xodimi: +99871 203-32-23 (537, 132, 413).