O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

Tanlov muddati: 01.08.2025 23:55

Oʻzbekiston Respublikasi Prezidentining, Oʻzbekiston Respublikasi Oliy Majlisi va Vazirlar Mahkamasining hujjatlari, davlat dasturlari va konsepsiyalarda bayon etilgan vazifa va topshiriqlarda belgilangan vazifalarni bajarilishida ilmiy yechimlarni ishlab chiqish uchun Ilmiy faoliyatga oid davlat maqsadli dasturi doirasida bajariladigan amaliy tadqiqotlar hamda innovatsion loyihalar tanlovi eʼlon qilinmoqda.

Tanlovga kelib tushgan loyihalar Oʻzbekiston Respublikasi Vazirlar Mahkamasining “Ilmiy-tadqiqot va innovatsion faoliyatni rivojlantirishning normativ-huquqiy bazasini yanada takomillashtirish chora-tadbirlari toʻgʻrisida” 2020-yil 9-martdagi 133-son qarorda belgilangan talablarga muvofiq quyidagi fan yoʻnalishlari boʻyicha eʼlon qilinadi:

1. Pedagogika va psixologiya fanlari
2. Texnika fanlari
3. Qishloq xoʻjaligi
4. Iqtisodiyot fanlari
5. Tibbiyot fanlari
6. Filologiya va ijtimoiy fanlar
7. Huquq fanlari
8. Yer toʻgʻrisidagi fanlar
9. Veterinariya va chorvachilik fanlari
10. Tarix va arxeologiya fanlari
11. Axborotlashtirish va axborot-kommunikatsiya texnologiyalarini rivojlantirish fanlari

Loyiha taqdim qilinganda loyiha rahbari oʻz loyihasi tadqiqot yoʻnalishidan kelib chiqib Oliy taʼlim, fan va innovatsiyalar vazirligi huzuridagi Ilmiy-texnik kengash yoʻnalishini tanlashi va shu yoʻnalish boʻyicha taqdim qilishi lozim.

Tanlovga taqdim etiladigan ilmiy loyihalar davlat ilmiy dasturlarining yagona intellektual elektron platformasi (loyiha.ilmiy.uz) orqali 2025-yilning 1-avgustga qadar faqat elektron shaklda qabul qilinadi.

Loyihani rasmiylashtirish shakli bilan tanishish uchun bu yerni bosing.

Tanlov shartlari.

1. Tanlovda ilmiy-tadqiqotlar oʻtkazish uchun imkoniyati va salohiyati mavjud ilmiy faoliyat subyektlari ishtirok etishi mumkin. Ilmiy faoliyat asosiy faoliyat turiga kirmaydigan tashkilotlar tomonidan taqdim etilgan loyihalar tanlovdan chetlashtiriladi.
2. Loyiha rahbari tomonidan tanlovga faqat bitta loyiha taqdim etilishi mumkin.

Bir vaqtning oʻzida bir turdagi ikkita loyihaga rahbar boʻlishiga yoʻl qoʻyilmaydi va ushbu holatga olib kelishi mumkin boʻlgan loyihalar qabul qilinmaydi.

1. Amaliy tadqiqot va innovatsion loyihalari boʻyicha ijrochi tashkilot Ilmiy (ilmiy-texnik) kengashi majlisining bayonidan koʻchirmada va loyihaning 4-shaklining 4.6-bandida bajarilishi rejalashtirilgan ilmiy loyiha yakunida qoʻlga kiritiladigan muhim ilmiy natija (yakuniy mahsulot, yangi ishlanma, texnologiya) quyidagi talablarga javob berishi qayd etilishi (asoslab berilishi) lozim:

Amaliy tadqiqotlar — aniq tarmoq yoki muayyan ijtimoiy sohadagi mavjud muammoning ilmiy yechimini taʼminlashga qaratilganligi (yillik talab/ehtiyoj aniq raqamlarda koʻrsatilishi lozim);

innovatsion loyihalar — ilmiy bogʻliqlikni hisobga olgan holda innovatsion loyihalar - ilmiy faoliyat subyektlari tomonidan amalga oshirilgan amaliy tadqiqotlar natijalarini innovatsiyalarni yaratish va ishlab chiqarishga yoʻnaltirilishini hisobga olgan holda shakllantiriladi.

Bunda, innovatsion loyihalar talabnomasiga asos bo‘ladigan tegishli amaliy tadqiqot olib borilgan bo‘lishi shart.

Loyiha natijalari joriy etiladigan ishlab chiqarish korxonalari bilan hamkorlik shakllari
va birgalikda bajariladigan ishlar koʻrsatiladi.

1. Tanlovga bajarilishi uch yilgacha moʻljallangan amaliy tadqiqotlar
   va bajarilishi ikki yilgacha moʻljallangan innovatsion loyihalari qabul qilinadi.
2. Loyihani amalga oshirish boshlangan vaqtda tuzilgan ilmiy jamoaning oʻrtacha yoshi, qoida tariqasida, 45 yoshdan oshmasligi kerak. (Ilmiy jamoaning oʻrtacha yoshi barcha ijrochilarning yoshini oʻrtacha arifmetik qiymati sifatida hisoblanadi).
3. E’lon qilingan mavzularga taqdim etiladigan ilmiy loyihalar tegishli vazirlik va idoralarning qo‘llab-quvvatlash xati mavjud bo‘lganida qabul qilinadi.
4. Ilmiy loyiha hujjatlarini Davlat ilmiy dasturlarining yagona intellektual elektron platformasi (loyiha.ilmiy.uz) orqali roʻyxatdan oʻtkazish jarayonida quyidagi hujjatlarning elektron nusxalari (pdf/doc) Elektron platformaga yuklanadi:

• ijrochi tashkilotning rahbari tomonidan imzolangan yoʻllanma xat (pdf);
• ijrochi tashkilotning ilmiy (ilmiy-texnik) kengashi qaroridan koʻchirma (pdf);
• amaliy va innovatsion loyiha matni (imzo va muhr qoʻyilgan holda, pdf
  va uning matn redaktori dasturidagi (doc/docx) shakli);
• tegishli vazirlik va idoralarning qo‘llab-quvvatlash xati (pdf).

1. Taqdim etilgan loyihada keltirilgan ilmiy yangilik, nou-xau va gʻoyalarni ekspertiza jarayonlarida ochiq muhokamaga qoʻyishning maqsadga muvofiqligi toʻgʻrisida ijrochi tashkilot vakolatli tuzilmasining (xizmatining) xulosasi loyihaga ilova qilinishi lozim.

Izoh: ijrochi tashkilot loyihada keltirilgan ilmiy yangilik, nou-xau va gʻoyalarni ekspertiza jarayonlarida ochiq muhokamaga qoʻyilganligi haqida vakolatli tuzilmaning (xizmatning) xulosasi taqdim etilmagan taqdirda, loyiha talabnomasi tanlovdan chetlashtiriladi.

1. Tanlovga taqdim etiladigan loyihani amalga oshirish uchun soʻralayotgan umumiy moliyalashtirish hajmini (5-shakl) hisoblashda Oliy taʼlim, fan va innovatsiyalar vazirligi tomonidan ushbu havolaga joylashtirilgan hisob-kitob shaklidan foydalanish tavsiya etiladi: http://loyiha.ilmiy.uz/site/example-docs.

1. Tanlovga taqdim etiladigan ilmiy loyihalar yakunida axborot tizimini ishlab chiqish, kompleks foydalanishga asoslangan dasturiy mahsulotlar, veb platformalar, mobil ilovalar yaratishga qaratilgan boʻlsa quyidagilar talab qilinadi:

a) Yaratiladigan dasturiy mahsulot uchun Adliya vazirligi huzuridagi Intellektual mulk agentligidan o‘rnatilgan tartibda ro‘yxatdan o‘tkazish va EHM uchun yaratilgan dastur guvohnomasini olish vazifasi loyiha talabnomasida aks etishi;

b) Dasturiy mahsulotning loyiha yakullangandan so‘ng, uzluksiz ishlashi va zarur hollarda ma’lumotlarni yangilab borish;

с) Loyiha talabnomasida kamida uch yillik “hosting” va “domen” (mobil ilova boʻlsa, mobil ilovalar doʻkoniga joylashtirish) xarajatlarini 5.4-shakldagi “loyihaning boshqa shu kabi xarajatlar” bandiga kiritisin;

d) Loyiha doirasida ishlab chiqiladigan yakuniy mahsulotni texnik qoʻllab-quvvatlash xarajatlarini qoplash maqsadida oʻz-oʻzini moliyalashtirish mexanizmini asoslantirish yoki ijrochi tashkilotning texnik qoʻllab-quvvatlash xarajatlarini qoplab berishi boʻyicha kafolat xati ilova qilish talab etiladi.

Eslatma: 

1. Tanlovga taqdim etilgan loyihalarning har bir bosqichda koʻrib chiqish natijalari toʻgʻrisidagi maʼlumotlar loyiha rahbarlarining Davlat ilmiy dasturlarining yagona intellektual elektron platformasidagi (loyiha.ilmiy.uz) shaxsiy kabinetlarida koʻrsatiladigan interaktiv xizmati orqali taqdim etib boriladi.

1. Tanlovga kelib tushgan loyihalar Oʻzbekiston Respublikasi Vazirlar Mahkamasining “Ilmiy-tadqiqot va innovatsion faoliyatni rivojlantirishning normativ-huquqiy bazasini yanada takomillashtirish chora-tadbirlari toʻgʻrisida” 2020-yil 9-martdagi 133-son qarorida belgilangan talablarga muvofiq dastlabki texnik ekspertizadan oʻtkaziladi.

1. Tanlovga taqdim etiladigan ilmiy loyihalar loyiha rahbarining yagona identifikatsiya tizimi (id.egov.uz) orqali roʻyxatdan oʻtgan shaxsiy kabineti orqali topshirilishi shart. Loyihaning ijrochilari yoki loyiha rahbari boʻlmagan shaxslar tomonidan taqdim etilgan ilmiy loyihalar tanlovga qabul qilinmaydi.

Ilmiy loyihalarni shakllantirish bilan bogʻliq masalalar boʻyicha Innovatsion rivojlanish agentligi masʼul xodimi: +99871 203-32-23 (537, 132, 413).

 

Ilmiy faoliyatga oid davlat maqsadli dasturi doirasida eʼlon qilinadigan amaliy tadqiqot hamda innovatsion loyihalar tanlovi mavzulari
ROʻYXATI

I. Amaliy tadqiqot loyihalar mavzulari:

1. “Pedagogika va psixologiya fanlari” yoʻnalishi boʻyicha

1.1. Sport kurashlarida tayyorgarlik turlarini tasnifi boʻyicha saralash texnologiyasini ishlab chiqish.

1.2. Oliy taʼlimda tahsil olayotgan imkoniyati cheklangan talabalarning adaptiv sport turlari boʻyicha jismoniy tayyorgarlik darajasini aniqlashning zamonaviy parametrlarini va pedagogik texnologiyalarini ishlab chiqish.

1.3. Mashgʻulot va musobaqa faoliyati sharoitida “Sunʼiy intellekt”ni qoʻllash orqali sportchilarning psixologik holatini korreksiyalash dasturiy taʼminotini yaratish.

1.4. Kriptotahlil fani bо‘yicha elektron о‘quv qо‘llanma yaratish.

1. “Texnika yoʻnalishi” yoʻnalishi boʻyicha

2.1. Zilziladan oldin, zilzila vaqtida va zilziladan keyin amaliy harakat qilishga oʻrgatishga moʻljallangan koʻchma mobil zilzila simulyatorini yaratish.

2.2. Samaradorli absorber qurilmasi yordamida tutun gazini zararli gazlardan tozalash texnologiyasini yaratish.

2.3. Radon monitoring nazorati va radon oʻlchash vositalarini kalibrlash uchun Havodagi radon faolligi birligi milliy etalonini yaratish.

2.4. Orol dengizi mintaqasi iqlimiga mos keladigan quyosh energiyasi bilan ishlaydigan xona havosini tozalash qurilmasini yaratish.

2.5. Vodorod generatorlarining energiya samaradorligini oshirish maqsadida elektrodlarni molibden va volfram qoplamali yangi funksional gradiyent material asosida yaratish.

1. “Qishloq xoʻjaligi” yoʻnalishi boʻyicha

3.1. Molekulyar markerlarga asoslangan seleksiya asosida suv kam talab qiluvchi va don sifati yuqori boʻlgan sholining yangi duragay, tizma va navlarini yaratish.

3.2. Masofadan turib Orolboʻyi zonalarining tuproq xususiyatlarini aniqlash uchun kosmik tasvirlarni spektral tahlil qilish.

3.3. Tuyaboʻgʻiz suv omborlarida baliqchilikni barqaror yuritish maqsadida baliq resurslarining koʻpayuvchanlik sharoitlarni aniqlash asosida baliq mahsuldorligini oshirish texnologiyasini yaratish.

1. “Tibbiyot fanlari” yoʻnalishi boʻyicha

4.1. Protez moslamalari va reabilitatsiya vositalarini ishlab chiqarishda titan qotishmalari asosida implantatsiya qilinadigan tibbiy mahsulotlar yuzasida biomoslashuvchan/bioaktiv qoplamalarni olish texnologiyasini yaratish.

4.2. Tanglay murtaklari surunkali kasalliklarini etiopatogenetik kechishida molekulyar-genetik omillarni oʻrganish va profilaktika algoritmini yaratish.

4.3. Ruhiy kasalliklarning oldini olish uchun mahalliy dorivor oʻsimliklar asosida yangi neyroprotektorli substansiya olish texnologiyasini yaratish.

4.4. Eshitish qobiliyati zaif bolalarda koxlear implantatsiyadan oldin va keyin ogʻiz boʻshligʻining morfo-funksional holatini oʻrganish hamda kompleks reabilitatsiya dasturini ishlab chiqish.

4.5. Oksimetalon, metandiyenon, degidroxlormetiltestosteronning sud-kimyo tezkor tekshiruv uslublari ishlab chiqish.

4.6. Ozdiruvchi biofaol qoʻshimchalar tarkibidagi sibutramin, metformin, fentermin, mefenorekslarni aniqlash kimyo-toksikologik texnologiyasini ishlab chiqish.

4.7. Surunkali rinosinusitlarni proliferativ turlarini etiopatogenetik mexanizmlarida molekulyar- genetik omillarning roli va klinik kechishini bashoratlash hamda davolash algoritmini ishlab chiqish.

4.8. Yuqori nafas yoʻllari virus- indutsirlangan kasalliklarini (residivlanuvchi hiqildoq papillomatozi) immunologik va molekulyar-genetik mexanizmlari asosida tashxislash, davolash va profilaktika hamda foniatriya yordamini yaratish.

4.9. Species Inuli, Species Origani, Glycyrrhiza glabra va Calendula officinalis oʻsimliklari asosida yangi kombinirlangan dori vositasini yaratish.

4.10. Standart transtorakal exokardiografiya va sunʼiy intelekt yordamida yurak-qon tomir kasalliklarida miokard infarkti mavjud bemorlarda kardioskleroz darajasini tashxislash texnologiyasini ishlab chiqish.

4.11. Jigarga xos va vaskulo-fibrogen omillar oʻrtasidagi munosabatlarni oʻrganish nuqtai nazaridan bolalarda surunkali HBV-infeksiyasining jadallashuv patogenezi va yangi diagnostik strategiyalarini ishlab chiqish.

1. “Axborotlashtirish va axborot-kommunikatsiya texnologiyalarini rivojlantirish fanlari yoʻnalishi boʻyicha” yoʻnalishi boʻyicha

5.1. Obyektni autentifikatsiya qilish protokollarini yaratish.

1. “Filologiya va ijtimoiy fanlar” yoʻnalishi boʻyicha

6.1. Jurnalistikaga oid milliy audiovizual kontentlarni raqamlashtirish va ommalashtirish.

6.2. Yolgʻiz (yolgʻiz yashovchi) keksalar, oʻzgalar parvarishiga muhtoj boʻlgan nogironligi boʻlgan shaxslar orasida moliyaviy savodxonlik darajasini aniqlash
va oshirishning metodologiyasi hamda elektron platformasini ishlab chiqish.

6.3. “Mirzo Ulugʻbek ilmiy-adabiy merosini tadqiq etish asosida olingan natijalarni maxsus elektron platformada targʻib etish.

1. “Huquq fanlari” yoʻnalishi boʻyicha

7.1. Kibermakonda sodir etilgan jinoyatlarni fosh etish hamda jinoyatlarga qarshi kurashishda zamonaviy kriminalistik faoliyatni joriy etish uchun moʻljallangan “Raqamli dalillar yagona reyestri” idoralararo avtomatlashtirilgan tizimini ishlab chiqish.

7.2. Oilaviy va maishiy zoʻravonlikka qarshi kurashish samaradorligini oshirishga qaratilgan innovatsion dasturiy taʼminot va platformani yaratish.

7.3. Sodir etilgan jinoyatlarning sabab va sharoitlarini tahlil qilish asosida jinoyatlarning barvaqt oldini olishga qaratilgan milliy “Crininology AI”- sunʼiy inttellekt texnologiyasini ishlab chiqish.

7.4. Kriminogen vaziyatning monitoringini amalga oshirish uchun Toshkent shahrining geoinformatsion xaritasining dasturiy taʼminotini yaratish.

1. “Tarix va arxeologiya fanlari” yoʻnalishi boʻyicha

8.1. Oʻzbekiston SSR da siyosiy qatagʻon qurbonlari (oz sonli millatlar va xorijliklar) elektron ensiklopediyasini yaratish.

8.2. Oʻzbekistonning raqamli etnokonfessional atlasini yaratish loyihasi.

1. “Yer toʻgʻrisidagi fanlar” yoʻnalishi boʻyicha

9.1. Oʻzbekiston hududi va unga yaqin maydonlarda geofizik maʼlumotlar asosida seysmik toʻlqinlar tarqalish regional godografni yaratish.

1. “Veterinariya va chorvachilik fanlari” yoʻnalishi boʻyicha

10.1. Qishloq xoʻjaligi hayvonlarini kanalardan (Ixodidae) muhofaza qilishning yangi ekologik xavfsiz texnologiyasini yaratish.

10.2. Hududlarning tuproq-iqlim sharoitiga mos, kasallik va zararkunandalarga bardoshli, tarkibida ozuqa birligi, protein miqdori yuqori yangi beda navlarini yaratish
va original urugʻlarini yetishtirishni yoʻlga qoʻyish.

10.3. Fitoterapiya veterinariya-yirik shoxli hayvonlarda tugʻruqdan keyingi endometritlarni davolash va oldini olishda iqtisodiy samaradorligi yuqori boʻlgan mahalliy dori vositalarini yaratish.

10.4. Orolboʻyi hududida baliqchilik sohasida baliq yetishtirishning ilmiy asoslangan usullari va intensiv texnologiyalarni ishlab chiqish.

10.5. Orolboʻyi hududlarida chorva uchun ozuqabop ekinlarni yetishtirish va mahsulot ishlab chiqarish boʻyicha namunaviy texnologik xaritalarni ishlab chiqish.

 

II. Innovatsion loyihalar mavzulari:

1. “Filologiya va ijtimoiy fanlar” yoʻnalishi boʻyicha

1.1. Chekka hududlarda istiqomat qiluvchi yolgʻiz keksalar va nogiron shaxslarni ijtimoiy xizmatlar bilan qamrab olishning alternativ yondashuvlarini ishlab chiqish.

1. “Iqtisodiyot fanlari” yoʻnalishi boʻyicha

2.1. Janubiy Orolboʻyi hududlarida qoraqalpoq milliy taomlari asosida gastroturizmni rivojlantirish mexanizmlarini ishlab chiqish.

2.2. Xiva va Bogʻot tumanlarining turistik resurslarini innovatsion yondashuv asosida qoʻshilgan qiymat zanjirini yaratish.

2.3. Buxoroga tashrif (Visit to Bukhara) elektron onlayn platforma va mobil ilovasini ishlab chiqish.