“Yoshlar oyligi”da qashqadaryolik yoshlar uchun munosib sovg‘a
2025-06-19 18:10:00 / Yangiliklar
Qarshi Yoshlar texnoparkining umumiy qiymati 13.5 mlrd soʻm boʻlib, bu yerda bir vaqtning o‘zida 400 nafar yoshni qamrab olish imkoniyati mavjud. “Web-dasturlash”, “Robototexnika”, “3D modellashtirish”, “Elektronika, “Video montaj”, “Grafik dizayn”, “AutoCAD” kabi 7 turdagi zamonaviy oʻquv kurslari doimiy faoliyat yuritadi.
Shular bilan birga, Texnoparkda yoshlarni innovatsion faoliyatlarga keng jalb etish, Ilm-fan, taʼlim va ishlab chiqarish integratsiyasini chuqurlashtirish, yoshlarning “startap” loyihalarini rivojlantirish va ularni amalga oshirish uchun yagona maydon yaratish maqsadida zamonaviy ishlab chiqarish uskunalari bilan jihozlangan “FabLab” tajriba-konstruktorlik hamda “Startap coworking” maydonlari tashkil etilgan.
Shuningdek, Texnoparkda yosh ixtirochi olimlarning gʻoyalarini biznes-modelga aylantirish, biznes boshqaruvida koʻmaklashish hamda yoshlarning tadbirkorlik salohiyatini oshirish maqsadida “InnoX” biznes-inkubator va akselerator dasturi yoʻlga qoʻyiladi. Bundan tashqari, geologiya, robototexnika, mexatronika, sun’iy intellekt, qishloq xoʻjaligi, dasturlash va raqamlashtirish yoʻnalishlarida loyihalarni amalga oshirish hamda 20 dan ortiq xizmat turlarini joriy etish rejalashtirilgan.