O‘zbekiston–Sloveniya birinchi innovatsion loyihalar forumi: ilm-fan va biznes hamkorligining yangi istiqbollari
2026-11-05 20:45:00 / Yangiliklar
2026-yil 5-noyabr kuni O‘zbekiston–Sloveniya birinchi innovatsion loyihalar forumi bo‘lib o‘tdi. Unda Innovatsion rivojlanish agentligi direktorining o‘rinbosari J. Abdujalilov ishtirok etdi.
Mazkur forum O‘zbekiston Respublikasi Prezidentining 2025-yil may oyida Sloveniyaga amalga oshirgan rasmiy tashrifi davomida erishilgan kelishuvlar ijrosi doirasida tashkil etildi.
Tadbir Innovatsion rivojlanish agentligi, Sloveniya Tashqi va Yevropa ishlari vazirligi hamda “SPIRIT Slovenia” biznesni rivojlantirish agentligi hamkorligida o‘tkazildi.
Forumda ikki mamlakatning davlat idoralari, oliy ta’lim muassasalari, ilmiy-tadqiqot tashkilotlari, texnoparklar, innovatsiya markazlari va biznes vakillari qatnashdi.
Muloqot davomida kritik xomashyo va noyob yer metallari, nanomateriallar, geologiya, konchilik, metallurgiya, foydali qazilmalarni boyitish va qayta ishlash kabi ustuvor yo‘nalishlarda hamkorlik istiqbollari muhokama qilindi.
Shuningdek, ilmiy ishlanmalarni tijoratlashtirish, universitetlar huzurida spin-off korxonalarini tashkil etish, texnologiyalar transferi, startap-ekotizimini rivojlantirish va yoshlarning muhandislik tashabbuslarini qo‘llab-quvvatlash masalalariga alohida e’tibor qaratildi.
Forum dasturidan Sloveniyaning innovatsion ekotizimi, texnologiyalar transferi mexanizmlari va startaplarni rivojlantirish tajribasiga bag‘ishlangan taqdimotlar ham o‘rin oldi. Ishtirokchilar qo‘shma ilmiy loyihalar, akademik almashinuv dasturlari va universitetlararo hamkorlikni kengaytirish yuzasidan fikr almashdilar.
Tadbir doirasida anglashuv memorandumini imzolash marosimi ham tashkil etildi.
Mazkur forum O‘zbekiston va Sloveniya o‘rtasida ilmiy-texnologik aloqalarni mustahkamlash, innovatsion ishlanmalarni iqtisodiyot tarmoqlariga joriy etish hamda istiqbolli qo‘shma loyihalarni amalga oshirish uchun yangi imkoniyatlar yaratishga xizmat qiladi.