O‘zbekiston va Koreya o‘rtasidagi ilmiy-innovatsion hamkorlik yangi loyihalar bilan kengaymoqda
2026-10-09 14:25:00 / Yangiliklar
Xususan, Koreya Milliy tadqiqot jamg‘armasi (NRF Korea) Xalqaro aloqalarni muvofiqlashtirish boshqarmasi direktori Hyesoo Kim bilan muzokaralarda 2026-yil 30-noyabr – 2-dekabr kunlari Seul shahrida bo‘lib o‘tadigan GRC Asia-Pacific Regional Meeting 2026 xalqaro tadbiriga tayyorgarlik masalalari muhokama qilindi.
Uchrashuv davomida tadbir dasturi, RRA, EDI va MLE ishchi guruhlari sessiyalarini tashkil etish, ma’ruzachilar va moderatorlar ishtiroki hamda tashkiliy-logistika masalalariga alohida e’tibor qaratildi. Shuningdek, tadbir o‘tkaziladigan Novotel Ambassador Seoul Gangnam mehmonxonasining konferensiya infratuzilmasi va texnik imkoniyatlari o‘rganildi.
Xizmat safari doirasida ENVELOPS kompaniyasi bosh ijrochi direktori Sung Yoon hamda Koreya Energetika Iqtisodiyoti Instituti katta tadqiqotchisi Minyoung Seo bilan ham uchrashuv tashkil etildi.
Muzokaralarning asosiy mavzusi Koreya hukumati mablag‘lari hisobidan amalga oshirilishi rejalashtirilayotgan, umumiy qiymati 7,2 million AQSH dollariga teng “Barqaror qishloq xo‘jaligi uchun aqlli agrivoltaika” loyihasi bo‘ldi.
Mazkur loyiha qishloq xo‘jaligida zamonaviy texnologiyalarni joriy etish, qayta tiklanuvchi energiya manbalaridan samarali foydalanish hamda barqaror qishloq xo‘jaligi amaliyotlarini rivojlantirishga qaratilgan. Uning amalga oshirilishi ilmiy ishlanmalarni amaliyotga tatbiq etish va qishloq xo‘jaligi sohasida innovatsion yechimlardan foydalanish imkoniyatlarini kengaytirishga xizmat qiladi.
Uchrashuvlar yakunida loyihani amalga oshirish bo‘yicha keyingi amaliy qadamlar belgilandi. Shuningdek, InnoWeek-2026 xalqaro innovatsion g‘oyalar haftaligi doirasida Innovatsion rivojlanish agentligi va ENVELOPS kompaniyasi o‘rtasida o‘zaro anglashuv memorandumini imzolash masalasi muhokama qilindi.
Ushbu muzokaralar O‘zbekiston va Koreya Respublikasi o‘rtasida ilm-fan, innovatsiyalar va zamonaviy texnologiyalar sohalaridagi hamkorlikni mustahkamlash, xalqaro sheriklikni rivojlantirish hamda istiqbolli loyihalarni hayotga tatbiq etish yo‘lidagi muhim qadamlardan biridir.