“Og‘ir” toifadagi 16 ta mahallalarni rivojlantirish bo‘yicha master reja ishlab chiqilmoqda
2026-09-29 18:10:00 / Yangiliklar
Innovatsion rivojlanish agentligida oliy ta’lim tashkilotlari talabalari tomonidan “og‘ir” toifadagi mahallalarni rivojlantirishga qaratilgan master-reja loyihalarini ishlab chiqishga bag‘ishlangan amaliy seminar bo‘lib o‘tdi.
Unda Innovatsion rivojlanish agentligi direktori o‘rinbosari J. Abdujalilov, Iqtisodiyot va moliya vazirligi departamenti boshlig‘i Sh. Otabayev, shuningdek, mahalliy va xorijiy ekspertlar hamda tanlovda ishtirok etayotgan jamoalar vakillari qatnashdi.
Mazkur tashabbus O‘zbekiston Respublikasi Prezidentining 2026-yil 5-fevraldagi “2026-yilda hududlarni yangicha yondashuvlar asosida rivojlantirish orqali aholi daromadini oshirish, barqaror ish o‘rinlarini yaratish hamda kambag‘allikni qisqartirish chora-tadbirlari to‘g‘risida”gi PQ-49-son qarori ijrosi doirasida amalga oshirilmoqda.
Shu maqsadda joriy yilning 1-avgust kuni Innovatsion rivojlanish agentligi tomonidan Oliy ta’lim, fan va innovatsiyalar vazirligi, Iqtisodiyot va moliya vazirligi, Makroiqtisodiy va hududiy tadqiqotlar instituti, Jahon banki hamda Yevropa Ittifoqi bilan hamkorlikda O‘zbekiston bo‘ylab 16 ta “og‘ir” toifadagi mahalla uchun talabalar tomonidan master-reja loyihalarini ishlab chiqish bo‘yicha tanlov e’lon qilingan edi.
Tanlovning birinchi bosqichida loyihaga biriktirilgan oliy ta’lim tashkilotlari tomonidan ichki tanlov asosida talabalardan iborat jamoalar shakllantirildi. Ularga 16 ta “og‘ir” toifadagi mahallaning mavjud holatini o‘rganish, hududni kompleks rivojlantirishga qaratilgan master-rejalarni ishlab chiqish vazifasi yuklatilgan.
Bugungi amaliy seminar ana shu jamoalar uchun master-rejalarni sifatli ishlab chiqishga ko‘maklashish maqsadida tashkil etildi. Unda hududlarni rivojlantirishda master-rejalarning ahamiyati, ularni ishlab chiqishga qo‘yiladigan minimal talablar, shuningdek, master-rejalarni ishlab chiqish, kelishish va tasdiqlash jarayonlari haqida tushunchalar berildi.
Seminarda so‘zga chiqqan mahalliy va xorijiy ekspertlar master-rejalarga qo‘yiladigan talablar, ularni amalga oshirish mexanizmlari hamda master-rejalarning boshqa turdagi rejalardan farqli jihatlari yuzasidan fikr almashdilar.
Tadbirning amaliy qismida ishtirokchilar poytaxtimizning Eski shahar qismida bo‘lib, bu yerda mahallalarni rivojlantirish bo‘yicha amalga oshirilgan ishlar bilan yaqindan tanishdilar.
Tanlov tartibiga ko‘ra, loyihalarning yakuniy taqdimoti joriy yilning 25-dekabriga qadar o‘tkaziladi. Yakuniy natijalarga ko‘ra, 16 ta jamoadan 5 tasi g‘olib deb topilib, 100 million so‘m miqdorida mukofot puli bilan taqdirlanadi.