O‘zbekistonlik 5 nafar talaba 2027-yulda Kyoto universiteti laboratoriyalarida 8 haftalik ilmiy amaliyot o‘tashi mumkin
2026-09-29 08:55:00 / Yangiliklar
O‘zbekiston Respublikasi Oliy ta’lim, fan va innovatsiyalar vazirligi hamda Kyoto universiteti delegatsiyasi o‘rtasida uchrashuv bo‘lib o‘tdi. Unda vazir o‘ronbosari, Innovatsion rivojlanish agentligi direktori O‘.Salomov hamda Kyoto universiteti vitse-prezidenti Fuyuki Ishikawa ishtirok etdi. Muloqot davomida O‘zbekiston va Yaponiya o‘rtasidagi ta’lim, ilm-fan va innovatsiyalar sohalaridagi hamkorlikni yanada rivojlantirish, xalqaro ilmiy aloqalarni kengaytirish hamda yosh tadqiqotchilar uchun yangi imkoniyatlar yaratish masalalari muhokama qilindi.
Uchrashuvda Kyoto universiteti vakillari universitetning ilmiy-tadqiqot salohiyati, xalqaro hamkorlik tajribasi, shuningdek, KU-STAR ilmiy-tadqiqot dasturi haqida ma’lumot taqdim etdilar. Mazkur dastur doirasida 2027-yilda O‘zbekistondan yuqori salohiyatga ega 5 nafar talabaning tanlab olinishi va ularning Kyoto universiteti laboratoriyalarida 8 haftalik ilmiy amaliyot o‘tashi rejalashtirilmoqda.
Tomonlar dastur ishtirokchilarini saralash mezonlari, talabalarni tegishli ilmiy laboratoriyalar bilan moslashtirish, moliyalashtirish mexanizmlari hamda amaliyotni tashkil etish bilan bog‘liq masalalar yuzasidan fikr almashdilar.
Uchrashuv yakunida tomonlar KU-STAR dasturini O‘zbekiston va Kyoto universiteti o‘rtasidagi amaliy ilmiy hamkorlikni kengaytirish, iqtidorli yoshlarning xalqaro ilmiy muhitda tajriba orttirishiga ko‘maklashish hamda yangi qo‘shma tashabbuslarni rivojlantirish uchun muhim platforma sifatida baholadilar.
Kelgusida mazkur yo‘nalishdagi hamkorlikni izchil davom ettirish, yosh olimlar va tadqiqotchilar uchun xalqaro ilmiy imkoniyatlarni kengaytirish hamda hamkorlikning yangi yo‘nalishlarini rivojlantirish bo‘yicha amaliy sa’y-harakatlarni kuchaytirish rejalashtirilmoqda.