Yosh xotin-qizlar uchun Turkiyada xalqaro malaka oshirish dasturi yo‘lga qo‘yildi
2026-09-24 09:50:00 / Yangiliklar
Innovatsion rivojlanish agentligi hamda Oila va xotin-qizlar qo‘mitasi hamkorligida xotin-qizlar bilan ishlash tizimda yuqori natijalarga erishayotgan yosh mutaxassislarning kasbiy salohiyatini oshirishga qaratilgan xalqaro malaka oshirish dasturi yo‘lga qo‘yildi.
Mazkur dastur doirasida birinchi guruh tarkibiga kiritilgan 33 nafar malakali yosh xotin-qizlar Turkiya Respublikasida 15 kunlik xalqaro stajirovkada ishtirok etmoqda.
Ishtirokchilar Istanbul Aydin universiteti, Istanbul Tijorat universiteti, Kichikchekmeje tumani hokimligi hamda “Yangi ta’lim” fondida tashkil etiladigan mashg‘ulot va amaliy tadbirlarda qatnashib, xotin-qizlar va oilalarni qo‘llab-quvvatlash borasidagi ilg‘or tajribalarni o‘rganadi.
Dastur davomida ayollar bandligi va tadbirkorligini rivojlantirish, ijtimoiy xizmatlarni tashkil etish, mahalliy boshqaruv, ijtimoiy himoya, oilaviy nizolarning oldini olish hamda yosh xotin-qizlarni kasbga yo‘naltirish masalalariga alohida e’tibor qaratiladi.
Shuningdek, ishtirokchilar raqamli transformatsiya, ma’lumotlarga asoslangan boshqaruv, ijtimoiy loyihalarni boshqarish, xalqaro grantlar va hamkorlik loyihalarini ishlab chiqish bo‘yicha amaliy mashg‘ulotlarda ishtirok etadi.
Xalqaro stajirovka doirasidagi tajriba almashinuvi yosh mutaxassislarning yangi bilim va ko‘nikmalarini shakllantirish bilan birga, xorijiy tajribani O‘zbekistonda xotin-qizlar bilan ishlash amaliyotiga tatbiq etish uchun yangi imkoniyatlarni yuzaga keltiradi.