Yosh o‘zbek olimi AQSHda kelajak texnologiyalari ustida tadqiqot olib bormoqda
2026-09-22 18:05:00 / Yangiliklar
Yosh olim uchun dunyoning yetakchi ilmiy laboratoriyalaridan birida tadqiqot olib borish — yangi bilim va tajribalarni egallash, xalqaro ilmiy muhitda o‘z salohiyatini sinash va eng ilg‘or yondashuvlarni o‘zlashtirish uchun muhim imkoniyat.
Toshkent shahridagi Turin politexnika universiteti dotsenti Anvar Xamidov ayni paytda AQSHning Dallas shahrida joylashgan Texas universiteti huzuridagi Alan G. MacDiarmid Nanotech Institute’ning NanoTech laboratoriyasida ilmiy tadqiqot olib bormoqda.
Yosh olimning tadqiqotlari professor Anvar Zaxidov rahbarligida, professor Mengmeng Zhang va doktor Ishara Kumari bilan hamkorlikda amalga oshirilmoqda.
U faoliyat olib borayotgan laboratoriyada zamonaviy nanomateriallar va uglerod nanotrubkalari (CNT) asosidagi funksional materiallarni yaratish, ularning xususiyatlarini o‘rganish hamda yuqori texnologik qurilmalarda qo‘llash imkoniyatlari tadqiq etilmoqda.
Xususan, uglerod nanotrubkalarini sintez qilish, CNT asosidagi tolalar va nanostrukturalarning mexanik, elektr va elektromexanik xususiyatlarini tadqiq etish, shuningdek, ularni energiya yig‘uvchi qurilmalar va sun’iy muskullar sifatida qo‘llash imkoniyatlari o‘rganilmoqda.
Nanomateriallar bilan bog‘liq bunday tadqiqotlar kelajak texnologiyalarini rivojlantirishda muhim yo‘nalishlardan biridir. Yosh olimning ushbu jarayonda xalqaro ilmiy jamoa bilan birga izlanish olib borayotgani esa zamonaviy ilmiy tajriba va metodlarni bevosita o‘zlashtirish imkonini bermoqda.
Ilmiy stajirovka davomida orttirilgan bilim va tajribalarni O‘zbekistonda nanomateriallar hamda yangi avlod energiya texnologiyalari bo‘yicha ilmiy tadqiqotlarni rivojlantirishga yo‘naltirish ko‘zda tutilgan.
Bugun yosh olimlarning dunyoning yetakchi ilmiy markazlarida tajriba orttirayotgani O‘zbekiston ilm-fanining yangi avlodini shakllantirish uchun muhim qadamdir. Har bir bunday ilmiy safar — yangi bilim, xalqaro hamkorlik va kelajakdagi tadqiqotlar uchun yangi imkoniyat demakdir.
Ma’lumot uchun, ilmiy stajirovka Ilm-fanni moliyalashtirish va innovatsiyalarni qo‘llab-quvvatlash jamg‘armasi tomonidan moliyalashtirilgan.