O‘zbekiston va Rossiya: ta’lim va innovatsiyalar sohasidagi hamkorlik masalalari muhokama qilindi
2026-09-22 11:15:00 / Yangiliklar
O‘zbekiston Respublikasi Oliy ta’lim, fan va innovatsiyalar vazirligi hamda Innovatsion rivojlanish agentligi delegatsiyasi ishchi tashrif bilan Rossiya Federatsiyasida bo‘ldi. Xizmat safari doirasida ta’lim, fan va innovatsiyalar sohasidagi hamkorlikni rivojlantirish masalalari muhokama qilindi.
Rossiyaning yetakchi texnika oliy ta’lim muassasalari, institutlari va ilmiy tashkilotlari bilan o‘tkazilgan uchrashuvlar yakunida O‘zbekiston Respublikasining Rossiya Federatsiyasidagi Favqulodda va Muxtor Elchisi B.Asadov bilan uchrashuv bo‘lib o‘tdi.
Unda oliy ta’lim, fan, innovatsiyalar va akademik almashinuv sohalaridagi hamkorlikni kengaytirish, shuningdek, Rossiya oliy ta’lim muassasalarining O‘zbekistondagi filiallari faoliyatini yanada rivojlantirish masalalari muhokama qilindi.
Shuningdek, O‘zbekiston delegatsiyasi Rossiya Federatsiyasi Fan va oliy ta’lim vaziri o‘rinbosari K.Mogilevskiy bilan uchrashdi.
Muloqot davomida Rossiya oliy ta’lim muassasalari filiallari talabalarining tilga moslashuvi, ishlab chiqarish amaliyotini tashkil etish, bitiruv malakaviy ishlarini Rossiyaning yetakchi korxonalari, ilmiy va ta’lim tashkilotlari bazasida bajarish, ikki diplomli dasturlar va akademik harakatchanlikni rivojlantirish masalalariga e’tibor qaratildi.
Tomonlar, shuningdek, qo‘shma ilmiy tadqiqotlar olib borish va laboratoriyalar tashkil etish, universitetlar, texnoparklar, startaplar hamda innovatsion ekotizimning boshqa ishtirokchilari o‘rtasidagi hamkorlikni kengaytirish istiqbollarini ko‘rib chiqdilar.
Sanoat va yuqori texnologiyali sohalar uchun talab yuqori bo‘lgan kadrlarni tayyorlash, raqamli ta’limni rivojlantirish hamda sun’iy intellekt sohasida qo‘shma loyihalarni amalga oshirish masalalariga ham alohida e’tibor qaratildi.
Erishilgan kelishuvlarni amaliy jihatdan amalga oshirish maqsadida hamkorlikning aniq yo‘nalishlari, mas’ul ijrochilar va amalga oshirish muddatlarini belgilash uchun qo‘shma ishchi guruh tuzish masalasi ko‘rib chiqilmoqda.