“Mohirlik va biznes soati” — yoshlarni kasb va tadbirkorlikka yo‘naltirishning yangi maydoni
2026-09-15 15:25:00 / Yangiliklar
Bugun yoshlarning bilim va ko‘nikmalarini amaliyot bilan uyg‘unlashtirish, ularni zamonaviy kasblarga yo‘naltirish hamda tadbirkorlik tashabbuslarini qo‘llab-quvvatlash davlat siyosatining ustuvor yo‘nalishlaridan biridir. Bu borada ta’lim muassasalarida yoshlar bilan ishlashning yangi va amaliy mexanizmlari joriy etilmoqda.
O‘zbekiston Respublikasi Prezidentining 2026-yil 11-fevraldagi PQ-59-son qarori ijrosini ta’minlash maqsadida Innovatsion rivojlanish agentligi tomonidan Qoraqalpog‘iston respublikasi hamda barcha viloyatlardagi belgilangan texnikum va umumta’lim maktablarida “Mohirlik va biznes soati” tadbirlari tashkil etilmoqda.
Mazkur tashabbus yoshlarni nafaqat kasb-hunarga o‘rgatish, balki ularda tadbirkorlik ko‘nikmalarini shakllantirish, innovatsion fikrlashni rivojlantirish, yangi g‘oyalarni ilgari surish va ularni amaliy tashabbuslarga aylantirishga xizmat qilmoqda.
Mashg‘ulotlarda yoshlarga zamonaviy kasblar va texnologiyalar, innovatsion yondashuvlar, tadbirkorlik asoslari, biznes g‘oyani shakllantirish va uni amaliy loyihaga aylantirish bo‘yicha tushunchalar berilmoqda. Eng muhimi, yoshlarning o‘z qiziqishi va salohiyatini aniq yo‘nalishga yo‘naltirishga e’tibor qaratilmoqda.
Bu kabi uchrashuvlar yoshlarni kelajak kasbiga ongli tayyorlash, ularning tashabbuslarini qo‘llab-quvvatlash va yangi imkoniyatlardan foydalanishiga ko‘maklashadigan amaliy platformaga aylanmoqda.
“Mohirlik va biznes soati” doirasidagi jarayonlar davom etmoqda. Mazkur tashabbus orqali hududlarda yoshlarning bilim va ko‘nikmalarini rivojlantirish, ularni innovatsion va tadbirkorlik faoliyatiga keng jalb etish bo‘yicha ishlar izchil davom ettiriladi.