Termitlarga qarshi mahalliy innovatsion yechim: “OKS” biopreparati ishlab chiqarilmoqda
2026-09-15 18:05:00 / Yangiliklar
Bir vaqtlar grant asosida boshlangan loyiha bugun mahsulot ishlab chiqarayotgan, sotuv hajmini 800 mln so‘mga yetkazgan va yangi ish o‘rinlari yaratgan korxonaga aylandi.
Termitlar nafaqat aholi xonadonlariga, balki tarixiy obidalar va madaniy meros obyektlariga ham jiddiy zarar yetkazishi mumkin. Shu bois ularga qarshi samarali, ekologik xavfsiz va mahalliy yechimlarni yaratish muhim ahamiyatga ega.
Bu borada 2021-yilda qo‘llab-quvvatlangan innovatsion loyiha bugun o‘zining amaliy natijasini bermoqda. Innovatsion rivojlanish agentligi tomonidan 441,9 mln so‘m mablag‘ bilan moliyalashtirilgan “Biologik pestitsidlarni ishlab chiqaruvchi ilmiy-ishlab chiqarish korxonasini tashkil qilish” startap loyihasi doirasida Urganch tumanida “Barkhan biotech” MChJ faoliyati yo‘lga qo‘yildi.
Loyiha doirasida termitlarga qarshi mo‘ljallangan “OKS” biopreparati ishlab chiqarilmoqda. Mualliflar tomonidan yaratilgan ushbu mahsulotni ishlab chiqarishda mahalliy xomashyodan foydalaniladi. Preparat aholi xonadonlari, tarixiy obidalar va madaniy meros obyektlarini termitlardan asrashga xizmat qilmoqda. Ayni paytda mahsulot respublikaning turli hududlariga yetkazib berilmoqda.
Loyihaning bugungi natijalari grant mablag‘larining amaliyotdagi samarasini yaqqol ko‘rsatmoqda. Korxonada 9 ta yangi ish o‘rni yaratilgan, yiliga 2 880 litr biologik pestitsid ishlab chiqarish quvvati yo‘lga qo‘yilgan. Eng muhimi, bugungi kungacha loyiha doirasida ishlab chiqarilgan mahsulotlarning umumiy savdo hajmi qariyb 800 mln so‘mni tashkil etdi.
Ayniqsa, loyihaning 2021-yilda moliyalashtirilganini hisobga olsak, bugungi natija grant mablag‘i faqat bir martalik moliyaviy ko‘mak emas, balki ilmiy g‘oyani mahsulotga, mahsulotni esa daromad keltiradigan ishlab chiqarishga aylantirish mexanizmi ekanini ko‘rsatadi.
Eng muhimi, mazkur loyiha misolida ilm — innovatsiya — ishlab chiqarish — bozor zanjiri amalda shakllanayotganini ko‘rish mumkin. Kecha grant asosida qo‘llab-quvvatlangan g‘oya bugun mahsulot ishlab chiqarayotgan, bozorda o‘z o‘rniga ega bo‘layotgan va yangi ish o‘rinlarini yaratayotgan korxonaga aylandi.
Bu esa innovatsion g‘oyalarni moliyaviy qo‘llab-quvvatlashning eng muhim natijasi — ilmiy ishlanmaning real mahsulotga, mahsulotning esa iqtisodiy qiymatga aylanishini namoyon etadi.