Quyosh energiyasidan samarali foydalanish orqali hosildorlikni 15% gacha oshirish mumkinligini bilasizmi?
2026-08-21 16:20:00 / Yangiliklar
Sirdaryo viloyatining Mirzaobod tumanida ishga tushirilgan “AGROVOLTAIK” startap loyihasi intensiv bog‘da buning natijasi kutilganidanda a’lo bo‘lishini isbotladi.
Mazkur loyiha dastlabki bosqichda O‘zbekiston milliy innovatsion tizimini modernizatsiya qilish loyihasi — MUNIS doirasida qo‘llab-quvvatlangan. Loyiha qiymati 45 ming AQSh dollarini tashkil etib, uning asosiy maqsadi quyosh panellari ostida qishloq xo‘jaligi mahsulotlarini yetishtirish, ekinlarni kuchli quyosh nurlaridan himoyalash va hosildorlikni oshirishdan iborat.
80 kVt quvvatli quyosh fotoelektr tizimi korxonaning kunduzgi elektr energiyasiga bo‘lgan ehtiyojining asosiy qismini ta’minlab, ortiqcha energiyani elektr tarmog‘iga uzatish imkonini bermoqda. Bugungi kungacha qariyb 12 ming kVt/soat elektr energiyasi ishlab chiqarilgan bo‘lib, shundan 7 ming kVt/soati tarmoqqa uzatilgan.
Loyihaning asosiy natijasi esa elektr ishlab chiqarish emas, balki qishloq xo‘jaligi mahsulotlari yetishtirish samaradorligini oshirishdir.
MAhsulotlarning ochiq maydonda quyoshdan kuyishi ayrim hollarda hosilning bozor qiymatini 20–30 foizigacha pasayishiga sabab bo‘lishi mumkin. “AGROVOLTAIK” tizimi ana shu muammoga yechim boldi.
Loyiha natijasida:
• meva yetishtirish samaradorligi — 20–25 foizga oshdi;
• yetishtirilgan mahsulot — 100 tonnadan ortiq;
• bozorga realizatsiya qilingan mahsulot — 80 tonnadan ortiq;
• qo‘shimcha va mavsumiy bandlik — 20 ga yaqin ish o‘rni;
• quyosh elektr energiyasi ishlab chiqarish — 12 ming kVt/soatga yaqin;
• elektr tarmog‘iga uzatilgan energiya — 7 ming kVt/soat.
Bugungi kunda xo‘jalikning 6,8 gektar maydonida malina yetishtirilmoqda. Shuningdek, bog‘ qator oralarida qo‘shimcha qishloq xo‘jaligi ekinlari yetishtirilib, tomchilatib sug‘orish texnologiyasidan foydalanilmoqda.
Loyiha keyingi bosqichda Yaponiya bilan hamkorlikda 800 ming AQSh dollari miqdoridagi investitsiya loyihasini amalga oshirishni rejalashtirmoqda.