Tadqiqot asosida yaratilgan texnologiyani transfer qilgan tadbirkor xizmatlari eʻtirof etildi
2026-08-18 17:25:00 / Yangiliklar
Bugun, Prezident Shavkat Mirziyoyev tadbirkorlar bilan VI ochiq muloqoti yakunida faxriy unvonlar, orden va medallar bilan taqdirlangan bir guruh tadbirkorlarga mazkur mukofotlarni tantanali ravishda topshirdi.
Navoiy viloyatidagi “Gidro stanko servis” mas’uliyati cheklangan jamiyati direktori Xamrayev Baxtiyor Djabbarovich mamlakatimiz sanoat salohiyatini yuksaltirish, zamonaviy ishlab chiqarishlarni rivojlantirish va innovatsion loyihalarni hayotga tatbiq etish borasidagi samarali faoliyati uchun “O‘zbekiston Respublikasida xizmat ko‘rsatgan tadbirkor” faxriy unvoni bilan taqdirlandi.
Mazkur yuksak mukofot O‘zbekiston Respublikasi Prezidentining 2026-yil 13-avgustdagi Tadbirkorlar kuni munosabati bilan soha vakillaridan bir guruhini mukofotlash to‘g‘risidagi farmoniga muvofiq berildi.
Ushbu “Gidro stanko servis” MCHJ tomonidan zamonaviy texnologiyalar asosida sanoat korxonalari uchun muhim bo‘lgan mahsulot va texnik yechimlarni ishlab chiqarishga alohida e’tibor qaratilmoqda. Korxona tomonidan amalga oshirilayotgan “Energiya tejamkor tishli (NSH) nasoslar ishlab chiqarishni tashkil etish” tijoratlashtirish loyihasi ham ana shunday innovatsion ishlanmalardan biridir. Loyiha tijoratlashtirish loyihalari qatoridan o‘rin olgan bo‘lib, uning doirasida energiya samaradorligini oshirishga xizmat qiluvchi tishli nasoslarni ishlab chiqarishni yo‘lga qo‘yish ko‘zda tutilgan.
Korxonada, shuningdek, yirik sanoat tarmoqlari, xususan, tog‘-kon sanoati uchun zamonaviy texnologik yechimlar yaratish va ishlab chiqarishga joriy etish ishlari olib borilmoqda. Jumladan, boshqaruv bloklari, energiya tejamkor nasos stansiyalari hamda elektrodvigatellar uchun invertorlar kabi mahsulotlarni ishlab chiqarish yo‘lga qo‘yilgan.
Bugungi kunda korxonada dasturiy ta’minot ishlab chiqish, qurilmalarni sinovdan o‘tkazish, texnik xizmat ko‘rsatish hamda ishlab chiqarish jarayonlarini takomillashtirish yo‘nalishlarida ishlar amalga oshirilmoqda. Bu esa mahalliy sanoatning texnologik imkoniyatlarini kengaytirish, zamonaviy va energiya samarador mahsulotlar ishlab chiqarish hamda yangi ish o‘rinlarini yaratishga xizmat qilmoqda.
Xamrayev Baxtiyor Djabbarovichning yuksak davlat mukofoti bilan taqdirlanishi Navoiy viloyatida sanoat va innovatsion ishlab chiqarishni rivojlantirish yo‘lidagi samarali mehnatning munosib e’tirofi bo‘ldi.
Mazkur yutuq korxona jamoasini yangi loyihalarni amalga oshirish, mahalliylashtirish darajasini oshirish va raqobatbardosh sanoat mahsulotlarini ishlab chiqarishni yanada kengaytirishga olib keladi.