O‘zbekistonda ochiq havodagi ta’limni rivojlantirish bo‘yicha milliy standart ishlab chiqilmoqda
2026-08-11 20:05:00 / Yangiliklar
Innovatsion rivojlanish agentligi ko‘magida Buxoro davlat universiteti Qo‘shma ta’lim dasturlarini muvofiqlashtirish bo‘limi o‘qituvchisi Maxliyo Atoyeva Malayziyaning Sultan Idris universitetida qisqa muddatli ilmiy stajirovka o‘tadi.
Stajirovkaning asosiy maqsadi Malayziyaning ochiq havodagi ta’lim (Outdoor Education) va tajribaviy ta’lim (Experiential Learning) yo‘nalishidagi ilg‘or tajribasini o‘rganish, uni O‘zbekiston sharoitiga moslashtirish hamda ta’lim va turizm sohalari integratsiyasining ilmiy-uslubiy asoslarini ishlab chiqishdan iborat bo‘ldi.
Stajirovka davomida Malayziya Turizm, san’at va madaniyat vazirligi (MOTAC) hamda soha tashkilotlari tajribasi o‘rganilib, sarguzasht turizmi va ochiq havodagi ta’lim faoliyatini xavfsiz va tizimli tashkil etishga qaratilgan Milliy standart operatsion tartib (SOP) loyihasi ishlab chiqildi. Shuningdek, O‘zbekiston ta’lim tizimi uchun “National Outdoor Education SOP” loyihasi ustida ish olib borilmoqda.
Ilmiy izlanishlar doirasida mehmonxona va turizm biznesini boshqarishda sun’iy intellekt va innovatsion texnologiyalardan foydalanish imkoniyatlari ham o‘rganildi. Sultan Idris universitetining Recreation Outdoor Education (ROE) va Experiential Learning loyihasi jamoasi bilan hamkorlikda Malayziya, Indoneziya va O‘zbekistonning turizm va madaniy salohiyatiga bag‘ishlangan “Uch davlat – bir nigoh” nomli ilmiy kitob tayyorlandi.
Stajirovka natijasida xalqaro ilmiy jurnallarda chop etish uchun turizm va mehmondo‘stlik sohasiga oid qator ilmiy maqolalar tayyorlandi. Shuningdek, ochiq havodagi ta’lim, tajribaviy ta’lim va sarguzasht turizmini ta’lim jarayoniga integratsiya qilishga qaratilgan ilmiy-uslubiy qo‘llanma hamda darslik yaratish ishlari davom ettirilmoqda.
Mazkur ilmiy stajirovka natijalari O‘zbekistonda Outdoor Education yo‘nalishining ilmiy, metodik va me’yoriy asoslarini shakllantirish, talabalarning amaliy va ijtimoiy kompetensiyalarini rivojlantirish hamda ta’lim va turizm sohalari o‘rtasidagi hamkorlikni kengaytirishga xizmat qiladi.
Ilmiy stajirovka ilm-fanni moliyalashtirish va innovatsiyalarni qo‘llab-quvvatlash jamgarmasi tomonidan moliyalashtirilgan.