O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

Toshkent kimyo-texnologiya institutining O‘zbekiston Respublikasi Prezidentining 2024-yil 10-dekabrdagi PQ-428-son qarori bilan tashkil etilgan Qarshi davlat texnika universiteti Shahrisabz oziq-ovqat muhandisligi fakulteti uchun maqsadli tayanch doktoranti Uzoqov Yusuf Rossiya Federatsiyasi Tatariston Respublikasidagi Qozon federal universitetida tashkil etilgan xalqaro malaka oshirish dasturini muvaffaqiyatli tamomladi.  “Qishloq xo‘jaligi xomashyosi va oziq-ovqat mahsulotlarida GMOlarni aniqlash” mavzusida tashkil etilgan malaka oshirish dasturi oziq-ovqat xavfsizligi va biotexnologiya yo‘nalishlarida zamonaviy ilmiy yondashuvlarni o‘rganishga qaratildi.

 Stajirovka davomida GMOlarni aniqlashda qo‘llaniladigan zamonaviy PCR texnologiyalari, DNK ajratish va tahlil qilish, genetik identifikatsiya hamda yuqori aniqlikdagi laboratoriya usullari o‘rganildi. Shuningdek, O‘zbekistonning turli hududlarida yetishtirilgan Asr va Alekseich navli mahalliy bug‘doy namunalarida DNK tahlillari amalga oshirilib, ularning yetishtirish hamda qayta ishlashdagi genetik xususiyatlari baholandi.

Amaliy mashg‘ulotlar davomida qishloq xo‘jaligi xomashyosi va oziq-ovqat mahsulotlarida GMOlarni aniqlash usullari, oziq-ovqat xavfsizligini ta’minlashda molekulyar-biologik yondashuvlarning ahamiyati, zamonaviy biotexnologik laboratoriyalarda ishlash ko‘nikmalari hamda organik qishloq xo‘jaligini rivojlantirishning ilmiy asoslari bo‘yicha xalqaro tajribalar o‘zlashtirildi.

 Shuningdek, dastur doirasida oziq-ovqat xavfsizligi, suv resurslaridan oqilona foydalanish, tuproq sho‘rlanishi, iqlim o‘zgarishi hamda aholi sonining ortishi sharoitida barqaror oziq-ovqat ta’minotini ta’minlash masalalariga bag‘ishlangan ilmiy seminar va amaliy mashg‘ulotlarda faol ishtirok etildi.

 Xalqaro malaka oshirish dasturi davomida orttirilgan ilmiy-amaliy tajribalar Toshkent kimyo-texnologiya instituti va Qarshi davlat texnika universitetida olib borilayotgan ilmiy tadqiqotlar samaradorligini oshirish, oziq-ovqat xavfsizligini ta’minlash, biotexnologik yondashuvlarni rivojlantirish hamda organik dehqonchilik sohasida zamonaviy ilmiy-amaliy yondashuvlarni keng joriy etishga xizmat qiladi.

 Malaka oshirish dasturi yakunida Yusuf Ahrol o‘g‘li Uzoqovga xalqaro namunadagi sertifikat hamda malaka oshirishni muvaffaqiyatli tamomlaganligini tasdiqlovchi guvohnoma topshirildi. Maʼlumot oʻrnida: Qozon federal universiteti dunyo reytingida yuqori oʻrinni egallagan boʻlib, QS reytingida TOP-450 talikka kirgan.