O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

26-iyun — Xalqaro giyohvandlikka qarshi kurash kuni munosabati bilan Innovatsion rivojlanish agentligi Qashqadaryo viloyat bo‘limi hamda Qarshi yoshlar texnoparki hamkorligida Qarshi davlat universitetida “Yoshlar narkotiklarga qarshi!” shiori ostida keng qamrovli ma’rifiy tadbir o‘tkazildi. Universitet professor-o‘qituvchilari, talaba-yoshlar hamda soha mutaxassislari ishtirok etgan ushbu uchrashuvdan ko‘zlangan asosiy maqsad yoshlar o‘rtasida giyohvandlik va narkojinoyatlarning barvaqt oldini olish, asr vabosiga aylangan ushbu illatning ayanchli oqibatlarini tushuntirish hamda yosh avlodning huquqiy va ijtimoiy mas’uliyatini oshirishdan iborat bo‘ldi. Muloqot davomida so‘zga chiqqan ekspertlar narkotik va psixotrop moddalarning inson salomatligi, ruhiyati hamda jamiyat ravnaqiga yetkazadigan halokatli zararlarini hayotiy misollar orqali tahlil qilib, ushbu turdagi jinoyatlar uchun qonunchilikda belgilangan qat’iy jinoiy javobgarlik choralari haqida batafsil ma’lumot berdilar. Mutaxassislar bugungi kunda davlatimiz tomonidan yoshlarning zamonaviy bilim va texnologiyalarni egallashi, innovatsion g‘oyalar hamda startap loyihalarini hayotga tatbiq etishi uchun barcha sharoitlar yaratib berilayotganini, bunday imkoniyatlar davrida har bir yosh o‘z kelajagiga mas’uliyat bilan yondashib, zararli illatlardan yiroq bo‘lishi shartligini alohida ta’kidladilar. Tadbir yakunida talabalar o‘zlarini qiziqtirgan savollarga javob olish barobarida, Qarshi yoshlar texnoparki imkoniyatlaridan unumli foydalangan holda o‘z intellektual salohiyatlarini namoyon etish, sog‘lom turmush tarzini tanlab, to‘g‘ri yo‘ldan borish bo‘yicha muhim tavsiyalar oldilar.