Byurokratiyani qisqartirish va elektron xizmatlarni takomillashtirish masalalari muhokama qilindi
2026-06-11 14:50:00 / Yangiliklar
Innovatsion rivojlanish agentligida “Byurokratiyani bartaraf etish – 2030” dasturini amalga oshirish va innovatsiyalarni joriy etish bo‘yicha loyiha ofisi mas’ul xodimlari ishtirokida ishchi uchrashuv tashkil etildi.
Uchrashuv davomida Agentlik tomonidan ko‘rsatilayotgan elektron davlat xizmatlari bilan bog‘liq byurokratik jarayonlarni keskin qisqartirish, xizmatlardan foydalanish qulayligini oshirish hamda fuqarolar va tadbirkorlik subyektlari uchun ortiqcha vaqt va resurs sarfini kamaytirish masalalari muhokama qilindi. Shuningdek, “Byurokratiyani bartaraf etish – 2030” dasturi doirasida amalga oshirilishi rejalashtirilgan chora-tadbirlar yuzasidan fikr almashildi.
Mamlakatimizda davlat boshqaruvi tizimini modernizatsiya qilish, davlat xizmatlarini raqamlashtirish va aholiga ko‘rsatilayotgan xizmatlar sifatini oshirish davlat siyosatining ustuvor yo‘nalishlaridan biri hisoblanadi. Shu maqsadda byurokratik to‘siqlarni bartaraf etish, idoralararo hamkorlikni kuchaytirish, ma’lumotlar almashinuvini soddalashtirish hamda inson omilini qisqartirishga qaratilgan tizimli islohotlar amalga oshirilmoqda.
Muhokamalar davomida Agentlik faoliyatida mavjud jarayonlarni tahlil qilish, ortiqcha tartib-taomillarni qisqartirish, elektron xizmatlarni yanada takomillashtirish va zamonaviy innovatsion yechimlarni joriy etish bo‘yicha takliflar ko‘rib chiqildi.
Mazkur yo‘nalishdagi ishlar natijasida davlat xizmatlarining tezkorligi va shaffofligini oshirish, fuqarolar hamda tadbirkorlar uchun qulay sharoitlar yaratish, korrupsion omillarni kamaytirish va davlat boshqaruvi samaradorligini yuksaltirish kutilmoqda. Bu esa o‘z navbatida aholi va biznes vakillarining davlat xizmatlaridan foydalanish imkoniyatlarini kengaytirib, mamlakatning innovatsion rivojlanishiga xizmat qiladi.