O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

O‘zbekiston Respublikasi Oliy ta’lim, fan va innovatsiyalar vaziri Qo‘ng‘irotboy Sharipov Namangan viloyatiga amalga oshirgan xizmat safari doirasida Davlatobod tumanida faoliyat yuritayotgan “NAM BIOTEST” MChJ korxonasida bo‘lib, uning ishlab chiqarish va innovatsion faoliyati bilan yaqindan tanishdi.

Jarayonda Namangan viloyati hokimi o‘rinbosari O. Bozarov, Davlatobod tumani hokimining innovatsiya masalalari bo‘yicha o‘rinbosari X. Abdumalikov hamda viloyat innovatsion rivojlanish bo‘linmasi vakillari ishtirok etdi.

Korxona rahbariyati tomonidan in vitro diagnostika yo‘nalishida ishlab chiqarilayotgan zamonaviy mahsulotlar, mavjud ishlab chiqarish quvvatlari hamda amalga oshirilayotgan innovatsion loyihalar haqida ma’lumot berildi.

Ta’kidlanganidek, korxona Namangan davlat texnika universiteti olimlari bilan hamkorlikda faoliyat olib bormoqda. Ayni paytda uni universitet huzuridagi “spin-off” korxonaga aylantirish bo‘yicha amaliy ishlar olib borilmoqda. Shuningdek, korxonaga universitetning 12 nafar bitiruvchisi ishga qabul qilinib, yosh mutaxassislarning bandligi ta’minlangan.

Muloqot davomida ilmiy ishlanmalarni tijoratlashtirish, innovatsion mahsulotlar ishlab chiqarish hajmini kengaytirish hamda oliy ta’lim, ilm-fan va ishlab chiqarish integratsiyasini yanada mustahkamlash masalalari muhokama qilindi.

Yakunda vazir korxonaning istiqbolli loyihalarini yuqori baholab, ularni moliyaviy va tashkiliy jihatdan qo‘llab-quvvatlash yuzasidan amaliy yordam ko‘rsatilishini ta’kidladi.

Mazkur o‘rganish jarayoni ilmiy ishlanmalarni amaliyotga joriy etish, innovatsion tadbirkorlikni rivojlantirish hamda hududlarda yuqori texnologiyali mahsulotlar ishlab chiqarishni kengaytirish borasidagi ishlarning muhim qismi sifatida e’tirof etildi.