O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

Joriy yilning 21-may kuni Bangkok shahrida bo‘lib o‘tayotgan “Global tadqiqot kengashining 2026-yilgi 14-yillik yig‘ilishi”ning yakuniy marosimi bo‘lib o‘tdi.

Mazkur nufuzli xalqaro tadbirda Innovatsion rivojlanish agentligi vakili Nargiza Mirraximova “Barqaror hamjamiyatlar uchun ilmiy tadqiqotlar” mavzusidagi muhokama yig‘ilishiga moderatorlik qildi.

Muhokamalar davomida Osiyo-Tinch okeani mintaqasi hamda boshqa hududlardan tashrif buyurgan delegatlar tomonidan zamonaviy jamiyatlar oldida turgan murakkab ijtimoiy, ekologik, texnologik va rivojlanish bilan bog‘liq muammolarni hal etishda ilm-fan va innovatsiyalarning o‘rni yuzasidan fikr almashildi. Shuningdek, jamiyat bilan hamkorlikda amalga oshiriladigan tadqiqotlarni rivojlantirish, ilmiy faoliyatning ijtimoiy ta’sirini kuchaytirish, sun’iy intellekt va ochiq ilm-fan tamoyillaridan samarali foydalanish hamda uzoq muddatli barqaror rivojlanishni qo‘llab-quvvatlashga qaratilgan moliyalashtirish va boshqaruv mexanizmlarini takomillashtirish masalalari muhokama qilindi.

Muhokamalar yakunida barqaror va inklyuziv rivojlanishni ta’minlashga xizmat qiluvchi ilmiy tadqiqotlarni qo‘llab-quvvatlash bo‘yicha qator muhim tavsiyalar ishlab chiqildi.

Tadbir yakunida “Global tadqiqot kengashining 2027-yilgi 15-yillik yig‘ilishi”ni o‘tkazuvchi davlat masalasi ham Global tadqiqot kengashi tomonidan ko‘rib chiqildi va tasdiqlandi.

Shuningdek, joriy yilning noyabr oyida Seoul shahrida bo‘lib o‘tadigan Osiyo-Tinch okeani mintaqasi uchun “Global tadqiqot kengashining mintaqaviy yig‘ilishi”ni tashkil qilish uchun Innovatsion rivojlanish agentligi Markaziy Osiyo davlatlari orasida birinchi marta hamkor tashkilot sifatida ishtirok etishi Global tadqiqot kengashi tomonidan rasman ma’qullandi.

Ma’lumot uchun, har yili Osiyo-Tinch okeani, Amerika, Yevropa, Yaqin Sharq va Shimoliy Afrika hamda Sahroi Kabirdan janubiy Afrika mintaqalari uchun “Global tadqiqot kengashining mintaqaviy yig‘ilishi“ tashkil etiladi. Mazkur yig‘ilishlarda xalqaro ilmiy tashkilotlar, tadqiqot fondlari, innovatsion agentliklar hamda ilm-fan sohasidagi vakolatli tashkilotlar rahbarlari ishtirok etib, ilm-fan va innovatsiyalarni rivojlantirish, xalqaro ilmiy hamkorlikni kengaytirish hamda global muammolarga ilmiy yechimlar ishlab chiqish masalalarini muhokama qiladilar. Ushbu tadbir Koreya Respublikasining Milliy tadqiqot jamg‘armasi hamda Innovatsion rivojlanish agentligi hamkorligida Koreyaning Seoul sharida tashkil etiladi.