Namanganda “spin-off” korxonalarini tashkil etish bo‘yicha amaliy seminar o‘tkazildi
2026-05-21 15:50:00 / Yangiliklar
Bugun, 21-may kuni Turan International University oliygohida Innovatsion rivojlanish agentligi tomonidan O‘zbekiston Respublikasi Prezidentining 2026-yil 4-apreldagi PF–54-sonli Farmoni ijrosini taʼminlash, ilm-fan va innovatsion faoliyatni yanada rivojlantirish, yangi ishlanmalar asosida ishlab chiqarishni yo‘lga qo‘yish hamda innovatsion ekotizimni mustahkamlash masalalariga bag‘ishlangan seminar tashkil etildi.
Tadbirda viloyatdagi oliy taʼlim va ilmiy-tadqiqot muassasalari prorektorlari, direktor o‘rinbosarlari, yuridik va moliya xizmatlari rahbarlari, shuningdek, yetakchi olim va tadqiqotchilar ishtirok etdilar.
Yangi ishlanmalarni tijoratlashtirish va iqtisodiyot tarmoqlari bilan hamkorlikni rivojlantirish boshqarmasi boshlig‘i o‘rinbosari B.Kamalov hamda bosh mutaxassis J.Xoliqulovlar ishtirokida o‘tgan seminarda ilm-fan va innovatsion faoliyatni rivojlantirish, oliy taʼlim muassasalarida yaratilayotgan yangi ishlanmalarni amaliyotga tatbiq etish hamda ularni iqtisodiyot tarmoqlari bilan integratsiya qilishning dolzarb ahamiyati xususida so‘z yuritildi.
Taʼkidlanganidek, farmonga muvofiq, endilikda oliy taʼlim va ilmiy muassasalar muassisligida innovatsion ishlanmalarga asoslangan “spin-off” korxonalarini tashkil etish imkoniyati yaratildi. Ushbu tashabbus ilmiy ishlanmalarni amaliyotga keng joriy etish, ularni tijoratlashtirish, yangi ishlab chiqarish quvvatlarini yaratish hamda iqtisodiyot tarmoqlari bilan integratsiyani kuchaytirishda muhim ahamiyat kasb etadi. Seminar davomida shuningdek, “spin-off” korxonalarini tashkil etish tartibi, mavjud imtiyozlar, moliyalashtirish mexanizmlari hamda innovatsion loyihalarni bozorga olib chiqish bo‘yicha amaliy tushuntirishlar berildi.
Ishtirokchilar o‘zlarini qiziqtirgan savollarga atroflica javob oldilar. Shu kabi seminarlar respublikamizning boshqa hududlaridagi oliy ta’lim muassasalarida ham o‘tkazilishi belgilangan.