O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

Oliy ta’lim muassasalarida innovatsion faoliyatni rivojlantirish, startap tashabbuslarini qo‘llab-quvvatlash hamda yoshlarning raqamli tadbirkorlik ko‘nikmalarini oshirish maqsadida “Raqamli startaplar” dasturiga bag‘ishlangan seminar tashkil etildi.

“Inno” innovatsion o‘quv-ishlab chiqarish texnoparkida o‘tkazilgan tadbirda oliy ta’lim muassasalari vakillari, professor-o‘qituvchilar, yosh olimlar, talabalar hamda startap tashabbuskorlari faol ishtirok etdi.

Seminar davomida ishtirokchilarga innovatsion g‘oyalarni startaplarga aylantirish bosqichlari, raqamli startap ekotizimini shakllantirish, inkubatsiya va akseleratsiya markazlari faoliyatini rivojlantirish, loyihalarni tijoratlashtirish hamda startaplarni investorlarga samarali taqdim etish bo‘yicha batafsil ma’lumotlar berildi.

Mutaxassislar tomonidan zamonaviy startap loyihalarini shakllantirishda kreativ fikrlash, jamoa bilan ishlash, bozor tahlili va texnologik yechimlarning ahamiyati haqida ham tushunchalar berildi. Shuningdek, yoshlarning innovatsion tashabbuslarini qo‘llab-quvvatlash mexanizmlari, mavjud grant dasturlari hamda startap ekotizimida yuzaga kelayotgan yangi imkoniyatlar yuzasidan tavsiyalar bildirildi.

Tadbir davomida ishtirokchilar o‘zlarini qiziqtirgan savollar bilan mutaxassislarga murojaat qilib, startap loyihalarini rivojlantirish va amaliyotga joriy etish bo‘yicha zarur tavsiyalar oldi.

Seminar yakunida oliy ta’lim tizimida innovatsion faoliyatni yanada kengaytirish, yoshlar startaplarini rivojlantirish, ilm-fan va biznes integratsiyasini mustahkamlash hamda yoshlarni innovatsion ekotizimga faol jalb etish masalalari yuzasidan fikr almashildi.