O‘zbekiston va Gruziya texnoparklari o‘rtasida doimiy hamkorlik yo‘lga qo‘yiladi
2026-04-20 17:05:00 / Yangiliklar
Joriy yilning 20-aprel kuni Innovatsion rivojlanish agentligida Gruziya Iqtisodiyot va barqaror rivojlanish vazirligi huzuridagi Gruziya innovatsiyalar va texnologiyalar agentligi (GITA) raisi o‘rinbosari Tornike Jobava boshchiligidagi delegatsiya bilan uchrashuv bo‘lib o‘tdi.
Uchrashuv ikki mamlakat o‘rtasida ilm-fan va innovatsiyalar sohasidagi xalqaro hamkorlikni mustahkamlash, bilim va tajriba almashish bo‘yicha qo‘shma dasturlarni yo‘lga qo‘yish, shuningdek innovatsion tashabbuslar, infratuzilma va ekotizimlar integratsiyasini rivojlantirishga qaratildi.
Muzokaralar davomida tomonlar O‘zbekiston va Gruziya o‘rtasida innovatsion ekotizimni rivojlantirish istiqbollari hamda amaliy mexanizmlarini muhokama qildilar. Shuningdek, startaplarni qo‘llab-quvvatlash yo‘nalishida tajriba almashish masalalariga alohida e’tibor qaratildi.
Tadbir doirasida “InnoWeek.Uz–2026” innovatsion g‘oyalar xalqaro haftaligi doirasida Gruziya bilan hamkorlikda qo‘shma xakaton (hackathon) tashkil etish tashabbusi ilgari surildi. Mazkur tadbir ikki davlatning iqtidorli yoshlari va startapchilari uchun o‘zaro tajriba almashish maydoni bo‘lib xizmat qilishi ta’kidlandi.
Shuningdek, uchrashuv yakunida ikki mamlakat texnoparklari o‘rtasida doimiy tajriba almashish tizimini yo‘lga qo‘yish bo‘yicha kelishuvga erishildi.
Mazkur hamkorlik O‘zbekiston va Gruziya o‘rtasidagi texnologik aloqalarni yangi bosqichga olib chiqishi, shuningdek mintaqaviy innovatsion muhitni yanada yaxshilashga xizmat qilishi qayd etildi.
Ma’lumot uchun, GITA innovatsiyalarni rag‘batlantirish, zamonaviy texnologiyalarni qo‘llab-quvvatlash, startaplar raqobatbardoshligini oshirish hamda ilm-fan va biznes o‘rtasidagi hamkorlikni rivojlantirish bo‘yicha keng vakolatlarga ega. So‘nggi 10 yil davomida agentlik moliyalashtirish dasturlarini joriy etib, ta’lim tashabbuslari, inkubatsiya va akseleratsiya dasturlari hamda texnologiyalar transferi loyihalarini amalga oshirgan, shuningdek mamlakat bo‘ylab texnoparklar tashkil etgan.